सिन्धुली । कमलामाई नगरपालिकाका मेयर खड्ग खत्रीले आफ्नो ५५ औं जन्मदिनका अवसरमा शनिबार भत्ता जम्मा गरेको खुत्रुके फुटाएर ट्रष्ट निर्माण भएको घोषणा गरेका छन । नगरपालिकाको मेयरको पदभार ग्रहण गरेदेखि विभिन्न कार्यक्रममा सहभागि हुदा पाएका भत्ता जम्मा गरेको खुत्रुके फोरेर आफ्नो जन्मदिन मनाएका हुन ।
उनले विभिन्न कार्यक्रममा पाएका भत्ताहरु जम्मा गरि राखेको खुत्रुके फोरेर ट्रष्ट निर्माण गर्ने घोषणा गरेका हुन । उनले आफु र आफ्नी श्रीमति शान्ता खत्रीको नाममा ट्रष्टको स्थापना गर्ने र सोहि ट्रष्टमा उक्त रकम जम्मा गर्ने गरि खुत्रुके फुटाएका हुन । उक्त ट्रष्टको नाम खड्ग शान्ता नवप्रवद्र्धक ट्रष्ट राखिएको छ ।
खुत्रुकेमा ४ लाख ५७ हजार ७ सय २० रुपैंया जम्मा भएको छ । जनप्रतिनिधि, नगरपालिकाका कर्मचारी, राजनीतिक दलका नेताहरु, पत्रकारहरुको उपस्थितिमा खुत्रुके खोलिएको हो ।
ट्रष्टलाई बैधानिक प्रक्रियामा लान समिति समेत निर्माण गरिएको खत्रीले जनाएका छन । ट्रष्टलाई जिल्ला प्रशासन कार्यालय सिन्धुलीमा दर्ता गरि बैधानिकता दिन र खाता खोल्नका लागि अध्यक्ष सूर्य पाख्रिन, सचिव हरि अधिकारी र कोषाध्यक्ष अम्बिका खत्रीलाई जिम्मा दिने समेत उनले घोषणा गरेका हुन ।
खत्रीले उक्त ट्रष्टले शिक्षा, स्वास्थ्य र वातावरणीय क्षेत्रमा काम गर्ने भएको बताए । उनले सहयोग गर्न चाहनेलाई ट्रष्टमा रकम जम्मा गर्न सक्ने पनि बताएका छन ।
२०७४ जेठ ५ गते कार्यभार सम्हालेका खत्रीले २०७७ फागुन १४ गतेसम्म आफुले पाएको भत्ता खुत्रुकेमा जम्मा गरेका थिए । आगामी दिनमा पनि भत्ताको पैसा खुत्रुकेमा जम्मा गर्ने उनले बताए । विकास निर्माणको पैसा भने उक्त ट्रष्टमा नहालिने उनले बताएका छन । जन्मदिनका अवसरमा उनले उपस्थित व्यक्तिहरुलाई लड्डु समेत खुवाएका थिए ।
