सिन्धुली । जिल्लामा शुक्रबार ९ जना कोरोना संक्रमित डिस्चार्ज भएका छन । जिल्ला प्रहरी कार्यालय सिन्धुलीका ७ जना प्रहरी र एपोलो अस्पतालमा उपचाररत २ जना गरि ९ जना डिस्चार्ज भएको सिन्धुली अस्पतालले जनाएको छ ।
डिस्चार्ज भएका ७ जना प्रहरी जिल्ला प्रहरी कार्यालयको आइसोलेसनमा बसि उपचार गराई रहेका थिए । डिस्चार्ज भएका सबैलाई सिन्धुली अस्पतालले विदाई गरेको सिन्धुली अस्पतालका व्यवस्थापक विमल श्रेष्ठले बताए । शुक्रबार डिस्चार्ज भएका ९ जना सहित कोभिड १९ संक्रमण मुक्त भई डिस्चार्ज हुनेको संख्या ६१ पुगेको छ ।
यसैबीच सिन्धुली अस्पतालमा कार्यरत एक २२ वर्षिय स्वास्थ्यकर्मी महिलामा कोरोना संक्रमण पुष्टि भएको छ । उनीसँगै जिल्लामा जम्मा संक्रमितको संख्या ६३ पुगेको छ । संक्रमित स्वास्थ्यकर्मी सिन्धुली अस्पतालको इमर्जेन्सीमा काम गर्थिन । उनलाई केहि दिन अघि सामान्य ज्वरो आएको भए पनि अहिले स्वास्थ्य अवस्था सामान्य रहेको अस्पतालले जनाएको छ ।
उनीसँगै उपचाररत संक्रमितको संख्या २ रहेको छ । एकजना कमलामाई नगरपालिका वडा नं. ६ की महिला होम आइसोलेसनमा बसी उपचार गराईरहेकी छिन भने संक्रमित स्वास्थ्यकर्मी महिलाको सिन्धुली अस्पतालको आइसोलेसनमा उपचार भईरहेको छ ।
