सिन्धुली । जिल्लामा राष्ट्रिय बाल दिवस २०७७ मनाउनका लागि सरोकारवालाबीच छलफल भएको छ । ‘विपदमा बाल अधिकारको सुनिश्चितता : हामी सबैको साझा प्रतिवद्धता’ भन्ने नाराका साथ मनाईन थालेको बाल दिवसका अवसरमा कमलामाई नगरपालिकाले विपदमा परेका बालबालिकाको उद्धार तथा राहतका लागि आपतकालिन बाल उद्धार कोष खडा गर्ने निर्णय गरेको छ ।
शुक्रबार सिन्धुलीमाढीमा कमलामाई नगरपालिकाका उपमेयर मञ्जु देवकोटाको अध्यक्षतामा बसेको बैठकले उक्त कोष स्थापना गर्ने निर्णय गरेको हो ।
दिवसका दिन उक्त कोष स्थापना गरिने भएको कमलामाई नगरपालिकाका उपप्रमुख मञ्जु देवकोटाले बताईन । बालदिवसका अवसरमा कमलामाई नगरपालिकाको ५० हजार र सामुदायिक विकास कार्यक्रमको ५० हजार सहयोग गरि एकलाख बराबरको कोष खडा गर्ने निर्णय भएको हो ।
यसैबीच बालदिवस मनाउने सन्दर्भमा भएको छलफलमा कमलामाई नगरपालिकाले जनज्योति मावि फोस्रेटारमा अध्ययनरत बौद्धिक अपांगता भएका बालबालिकालाई खेलकुद सामग्री सहयोग गर्ने निर्णय भएको छ ।
यस्तै रेडियो सिद्धवावाले आधारभूत तहका बालबालिकाका लागि कविता प्रतियोगिता र मावि तहका बालबालिकाका लागि निवन्ध प्रतियोगिता गर्ने भएको छ । बालदिवसका अवसरमा उक्त रेडियोले सम्वाद कार्यक्रम समेत गर्ने निर्णय भएको छ । रेडियो कार्यक्रमका लागि नगरपालिकाले उक्त रेडियोलाई २५ हजार आर्थिक सहयोग गर्ने भएको छ ।
