सिन्धुली । शिक्षक अपहरणका दोषी ८ जनालाई प्रहरीले आइतबार पक्राउ गरेको छ । तिनपाटन गाउँपालिका वडा नं. ८ बाहुनतिल्पुङमा रहेको भिमसेन आधारभूति विद्यालयका प्रधानाध्यापक ४५ वर्षिय नारायण प्रसाद भण्डारीलाई २०७७ भदौ १३ गते अपहरण गर्ने विप्लवका कार्यकर्तालाई प्रहरीले नियन्त्रणमा लिएको जिल्ला प्रहरी कार्यालय सिन्धुलीका डिएसपी श्याम बहादुर खत्रीले बताए ।
खत्रीले एकजना महिलालाई शनिबार र अन्य ७ जना पुरुषलाई आइतबार पक्राउ गरिएको बताए । शनिबार विहान अपहरणमा परेका भण्डारी स्थानीय र प्रहरीको घेराबन्दी पछि चार घण्टापछि तिनपाटन गाउँपालिका ८ लायोगाउँबाट अपहरणमुक्त भएका थिए ।
एकजना महिलालाई सोहि ठाउँबाटै पक्राउ गरिएको थियो भने अन्य ७ जनालाई महादेवडाँडाबाट पक्राउ गरिएको थियो । सबैको पूर्ण विवरण सहित पक्राउ गरिएका व्यक्तिहरु जिल्ला प्रहरी कार्यालयमा नल्याई सकिएको खत्रीले बताए । उनीहरुले फरक फरक नाम र ठेगाना बताईरहेकाले पूर्ण विवरण दिन कठिनाई भएको समेत खत्रीले बताए ।
घटनापछि शसस्त्र प्रहरी र जनपथ प्रहरीलाई अपहरणमा संलग्न व्यक्तिहरुको खोजीका लागि घटनास्थल तर्फ पठाईएको थियो । पक्राउ गरिएका व्यक्तिहरुसँग बम बनाउने सामग्रीहरु समेत बरामद गरिएको उनले बताएका छन । जसमा पाँचथान सुतली बम, दुईवटा सकेट बम र आठ वटा बम बनाउन प्रयोग गरिने सकेट बरामद भएको उनले बताए । उनीहरु नेकपा माओवादी (विप्लव) का कार्यकर्ता रहेको पनि प्रहरीले जनाएको छ ।
