सिन्धुली । सिन्धुलीमा समुदायमा कोरोना फैलन थालेको छ । समुदायसँगै सरकारी कर्मचारी, शिक्षक लगाएतका पेशाकर्मीमा समेत कोरोना संक्रमण देखिन थालेको छ ।
जिल्ला आयुर्वेद स्वास्थ्य केन्द्रका पाँच जना कर्मचारीमा शुक्रबार कोरोना संक्रमण देखिए पछि जिल्ला आयुर्वेद स्वास्थ्य केन्द्र शिल गरिएको छ । परिक्षणका लागि ५ जनाको स्वाव पठाईएकोमा सबैको रिपोर्ट शुक्रबार पोजेटिभ आएपछि शनिबारदेखि १४ दिनका लागि स्वास्थ्य केन्द्र बन्द गरिएको जिल्ला प्रशासन कार्यालय सिन्धुलीका सहायक प्रमुख जिल्ला अधिकारी ऋद्धि प्रकाश सिटौलाले जनाएका छन । उनले सार्वजनिक सूचना जारी गर्दै कोरोना फैलन नदिन कार्यालय शिल गरिएको जानकारी दिएका छन ।
यसैबीच शुक्रबार नै सुनकोशी गाउँपालिका वडा नं. ३ का ६२ वर्षिय पुरुषमा पनि कोरोना संक्रमण देखिएको छ । केहि दिन अघि सुनकोशीकै एक शिक्षकमा पनि कोरोना संक्रमण देखिएको थियो । यस अघि कमलामाई नगरपालिका वडा नं. ६, ७ र ५ मा समुदायमा संक्रमण देखिएको छ ।
यस्तै शनिबार गोलञ्जोर गाउँपालिकाका एक पुरुषमा कोरोना पोजेटिभ देखिएको छ । कमलामाई नगरपालिका वडा नं. ६ रातामाटामा रहेको बस्नेत होटलमा करिब एक सातादेखि बस्दै आएका उक्त गाउँपालिकाका एक कर्मचारीमा कोरोना पोजेटिभ देखिएको हो ।
उनमा कोरोना पोजेटिभ देखिएपछि बसेको होटल शनिबार नै शिल गरिएको छ । सिन्धुलीमा हालसम्म ४३ जनामा कोरोना संक्रमण देखिएको छ । संक्रमितमध्ये १२ जना निको भएर घर फर्केका छन ।
