सिन्धुली । संघिय सांसद एवम वैज्ञानिक वनको अनुगमन छानविन उप समितिका संयोजक प्रदीप यादवलाई कोरानो भाईरस संक्रमण भएको पुष्टि भएपछि डिभिजन वन कार्यालयले कार्यालय सिन्धुलीले कार्यालयबाट दिने सेवा बन्द गरेको छ ।
यादव जिल्लामा वन अनुगमनमा आएकाले कोरोना संक्रमण फैलन सक्ने सम्भावनालाई मध्यनजर गरि डिभिजन वन कार्यालयबाट दिईने सेवा बन्द गरिएको डिभिजन वन कार्यालय सिन्धुलीले सूचना जारी गरि जनाएको छ ।
उनी वैज्ञानिक वन अनुगमनको शिलशिलामा सिन्धुली आई साउन १४ गते वन सम्बन्धि अन्तक्र्रियामा जिल्लाका सरोकारवालासँग सहभागि भएका थिए । वन कार्यालयका प्रमुख सहित कर्मचारीहरु समेत यादवको सम्पर्कमा रहेकाले शनिबारदेखि कार्यालयको सबै सेवा अर्को सूचना जारी नभएसम्मका लागि बन्द रहेको कार्यालयले जनाएको छ ।
कार्यालयका प्रमुख नारायण श्रेष्ठले सूचना जारी गरि सेवा बन्द रहदा सेवाग्राहीहरुमा पर्न गएको असुविधा प्रति डिभिजन कार्यालय क्षमा प्रार्थी रहेको जनाएका छन ।
यसैबीच यादवसँग सम्पर्कमा रहेका जिल्लाका सांसदहरु, पत्रकार, वनसँग सरोकार राख्ने व्यक्तिहरु, स्थानीय तहका प्रमुख प्रतिनिधिहरु लगाएतलाई होम क्वारेन्टाईनमा बस्न प्रमुख जिल्ला अधिकारी योगेन्द्र प्रसाद पाण्डेले अनुरोध गरेका छन । उनले सबैलाई घरभित्रै सुरक्षित रहन र कसैको सम्पर्कमा नजान फोन मार्फत अनुरोध गरिएको बताए ।
