सिन्धुली । सिन्धुलीका एक कोरोना संक्रमितलाई धुलिखेल अस्पतालमा भेन्टिलेटरमा राखेर उपचार गरिएको छ । उनको अवस्था गम्भिर रहेको धुलिखेल अस्पतालले जानकारी दिएको सिन्धुली अस्पताल विकास समितिका अध्यक्ष प्रलाद पोखरेलले बताए । सुनकोशी गाउँपालिका वडा नं. ६ सितलपाटीका ४७ वर्षिय पुरुषको अवस्था गम्भिर भएको उनले बताए ।
विहिबार भारतबाट आउँदै गर्दा उनमा स्वासप्रश्वासमा समस्या आएपछि उनी सिधै सिन्धुली अस्पतालमा आएका थिए । उनलाई सिन्धुली अस्पतालले आइसोलेसनमा भर्ना गरे पनि स्वास्थ्य अवस्था नाजुक भई स्वास प्रस्वासमा समस्या, अत्यधिक ज्वरो देखिएपछि अस्पतालले शुक्रबार विहानै धुलिखेल अस्पतालमा रिफर गरेको थियो ।
सिन्धुली अस्पतालमा भेन्टिलेटर नभएपछि उनलाई एम्बुलेन्समा हाली धुलिखेल अस्पतालमा पठाईएको र त्यहाँ परिक्षण गर्दा उनमा कोरोना संक्रमण देखिएको थियो । ‘विरामीको अवस्था नाजुक रहेको जानकारी आएको छ, भेन्टिलेटरमा राखेर उपचार गरिएको धुलिखेल अस्पतालले जनाएको छ,’ उनले भनेका छन । पोखरेलका अनुसार कोभिडका गम्भिर विरामी आएमा सिन्धुली अस्पतालमा भेन्टिलेटर नहुदा राख्न नसकिने भएको छ ।
