सिन्धुली । कमलामाई नगरपालिका वडा नंं १४ मा रहेको जनता मावि चन्दनपुरमा भारतबाट आएका नागरिकलाई क्वारेन्टाईन बनाई व्यवस्थापन गर्न खोज्दा चन्दनपुरबासीले विरोध जनाएका छन । उनीहरुले २ दिन अघि भारतबाट आएका वडा बासी र वडा नं. १३ का नागरिकलाई क्वारेन्टाईनमा राख्दा कोरोना भाईरस संक्रमण हुने भन्दै विरोध जनाएका हुन ।
उनीहरुले जनप्रतिनिधि तथा अगुवाहरुका कारण संक्रमण फैलिने भन्दै वडा कार्यालयकै विरोध जनाएका हुन । उनीहरुले हुलहुज्जत सहित अवरोध गर्न खोजेको बताईएको छ ।
स्थानीयले विरोध गरेपछि वडा नं. १३ ले प्रभात माविमा क्वारेन्टाईन निर्माण गरि आफ्ना वडाका नागरिकलाई व्यवस्थापन गरेको छ । शनिबार भारतबाट वडा नं. १३ का ४ जना र वडा नं. १४ का १५ जना भारतबाट आएका थिए ।
स्थानीयको विरोधका बावजुद वडा र नगरपालिकाको समन्वयमा १४ नं. वडाका १५ जनालाई भने जनता माविमै राखिएको छ । थप १४ जना सिन्धुली आईसकेको र उनीहरुको व्यवस्थापनको तयारी भईरहेको वडा नं. १४ का वडा सचिव अनन्त पोखेरलले बताएका छन ।
उनका अनुसार भारतको राँचीमा होटलमा मजदुरी गर्न गएका थप ६६ जना आउँदै गरेको जानकारी वडालाई आएको छ । यो सँगै उक्त वडामा मात्रै ९५ जनाका लागि क्वारेन्टाईन तयारी राख्नुपर्ने देखिएको छ ।
पोखरेलका अनुसार वडामा भारतबाट आउने अझै थप हुन सक्ने देखिएकाले क्वारेन्टाई व्यवस्थापनमा समस्या हुन देखिएको छ । क्वारेन्टाईन बनाईएको उक्त विद्यालयमा बढीमा एकसय जना मात्र राख्न सकिने भएकाले अन्यलाई व्यवस्थापन कसरी गर्ने र कहाँ गर्ने भन्ने विषयमा वडा कार्यालय नै अन्यौलमा परेको छ ।
क्वारेन्टाईन व्यवस्थापनका लागि वडाले कमलामाई नगरपालिकासँग समन्वय गरेको छ । नगरपालिकाले खाद्यान्न र मेट्रेसको व्यवस्थापन गरिदिने भएको छ । बाँकी काम वडा कार्यालयले गर्ने छ ।
