सिन्धुली । जिल्ला बाहिरबाट सिन्धुली ल्याउन प्रतिवन्ध लगाईएको माछा, अण्डा र चल्ला आयातमा खुला गरिएको छ । उद्योग वाणिज्य संघ सिन्धुलीको दवावमा उक्त निर्णय गरिएको हो । प्रमुख जिल्ला अधिकारी योगेन्द्र प्रसाद पाण्डेको अध्यक्षतामा बसेको जोखिम व्यवस्थापन केन्द्र र जिल्ला सुरक्षा समितिको बैठकले उक्त निर्णय गरेको हो ।
उक्त बैठकले तराई लगाएत सबै जिल्लाबाट अण्डा कुखुराका चल्ला र जिउँदो माछामा बैशाख ३ गतेदेखि लगाईएको प्रतिवन्ध फुकुवा गरेकोे हो । कोभिड १९ को संक्रमण तराई लगाएतका जिल्लामा देखिन थालेपछि संक्रमण हुन सक्ने भन्दै सर्वदलीय सर्वपक्षिय निर्णयबाट माछा मासु, अण्डा, चल्ला, तरकारी फलफूलको आयातमा रोक लगाइएको थियो ।
उक्त बैठकमा उद्योग वाणिज्य संघका अध्यक्ष अमरेश चन्द्र बैदार, वरिष्ठ उपाध्यक्ष अर्जुकुमार श्रेष्ठ, महासचिव विरवल चौधरी, लगाएतका व्यवसायीहरु, सुरक्षा निकाय प्रमुखहरु र नेपाल रेडक्रस सोसाईटीका सभापति अशोक श्रेष्ठको सहभागिता रहेको थियो ।
बैठकले सर्वदलिय सर्वपक्षिय बैठकबाट अनुमोदन गर्ने गरि चल्ला, अण्डा र जिउँदो माछाका आयात खुला गरेको जनाएको छ । यसले भने सर्वसाधारण नागरिकमा तराईका जिल्लाबाट आयातसँगै कोरोना भित्रिने आशंका र त्रासमा रहेका छन । सोमबार बसेको सर्वदलिय बैठकले व्यवसायीको दवावका बावजुद हरियो तरकारीलाई मात्र खुला गरेको थियो ।
सोमबारको बैठकमा निर्माणका सबै काम खुला गर्नुपर्ने, निर्माण सामग्री भित्रिन दिनुपर्ने लगाएतका विषयमा राजनीतिक दवाव समेत आएको थियो ।
यसैगरि सिन्धुलीमा अघोषित रुपमा लकडाउनलाई लचिलो बनाउँदै लगिएको छ । सबै स्थानीय तहले विकासका काम सुरु गरेका छन । विपी राजमार्गको मर्मतको काम, मदन भण्डारी राजमार्गको निर्माणका काम लगाएतका ठूला आयोजनाहरुमा पनि काम सुचारु भएका छन भने सबै तहले योजनाहरु सञ्चालन गर्न पाउनुपर्ने भन्दै काम सुरु गर्न सहजीकरण गरेका छन । जसका कारण दैनिक जिल्ला प्रशासन कार्यालय सिन्धुलीले ढुवानीका साधानहरुलाई पास वितरण गर्न थालेको छ ।
