सिन्धुली । दुधौली नगरपालिकाले विदेशबाट आएका व्यक्तिहरुको तथ्यांक संकलन गरि रहेको छ । दुधाजनप्रतिनिधि र नगर प्रहरी परिचालन गरि विदेशबाट आएका व्यक्तिको विवरण संकलन गरिएको हो ।
हालसम्म ३७ जनाको विवरण संकलन भएको मेयर घनश्याम राउतले बताए । उनका अनुसार ती व्यक्तिहरुलाई होम क्वारेन्टाइनमा राखि घरमै स्वास्थ्य जाँच गर्ने प्रवन्ध मिलाईएको छ । उनीहरुको स्वास्थ्य परिक्षणका लागि स्वास्थ्यकर्मी र नगर प्रहरीको एक टोली निर्माण गरि खटाईएको छ । नियमित रुपमा घर घरमा नै पुगेर स्वास्थ्य जाँच गर्दै आएको मेयर राउतले बताए ।
चेकजाँचका क्रममा वडा नंं १३ अरुणठाकुरमा १० दिन अघि मलेसियाबाट घर आएका एक व्यक्तिलाई ज्वरो आएपछि टोलीले उपचारको लागि सिन्धुली अस्पताल पठाइएको मेयर राउतले बताए । उनलाई सिन्धुली अस्पतालको आइसोलेसनमा विहिबार राती नै भर्ना गरिएको छ ।
अन्य ३६ जना व्यक्तिहरुको स्वास्थ्य अवस्था अहिलेसम्म सामान्य नै रहेको मेयर राउतले बताए ।
कोभिड–१९ को संक्रमण हुनबाट बच्न नेपाल सरकारले गरेका लकडाउन प्रभावकारी रुपमा कार्यान्वयन गर्न नगरपालिकाले सवैलाई घरमा नै बस्न आग्रह गरेको छ । जसका लागि वडा कार्यालयहरु तथा टोल विकास संस्थाहरुले निगरानी बढाएका छन ।
साथै उनीहरुले सवैको घर–घरमा पुगेर कोरोना भाइरसबाट बच्ने उपायको बारेमा जानकारी दिदै आएका छन ।
यस्तै नगरपालिकाले सामान्य माक्र्स उत्पादन गरि १४ वटै वडामा उपलब्ध गराएको छ । अहिले वडा स्तरबाट निःशुल्क माक्स वितरण भै रहेको मेयर राउतले बताए ।
नाका प्रवेशमा रोक
दुधौली नगरपालिकाले नगरपालिका छिर्ने नाकामा बाहिरबाट आउने व्यक्तिलाई रोक लगाउन प्रहरी परिचालन गरेको छ । नगरपालिका प्रवेश गर्ने नाका झुगाँ, खोक्सा, र सिम्राईमा प्रवेश रोक लगाउन प्रहरी परिचालन गरिएको हो । २ नं प्रदेशसंग जोडिएको नाकाहरुबाट अन्य नागरिक आउने भन्दै नगरपालिका प्रवेशमा पुर्ण रुपमा रोक लगाईएको राउतले बताए ।
दुई वेडको आइसोलेसन र १० वेडको क्वारेन्टाईन
नगरपालिकाले दुई वेडको आईसोलेसन र १० वेडको क्वारेन्टाईन निर्माण गरेको छ । प्राथमिक स्वास्थ्य केन्द्र सिर्थौलीमा २ वेडको आइसोलेसन निर्माण गरिएको मेयर राउतले बताए ।
यस्तै दुधौलीमा रहेको कवर्ड हलमा १० वेडको क्वारेन्टाईन निर्माण गरिएको छ भने नगरपालिकाले कमलामा मावि भलुवाईमा थप १० वेडको क्वारेन्टाईन निर्माण गरिरहेको राउतले बताए । नगरपालिकाले स्वास्थ्यकर्मीका लागि आवश्यक पर्न ७ सेट पिपीई पनि खरिद गरेको जनाएको छ । पिपीई लगाएत अन्य सामग्री खरिदका लागि पहल भईरहेको पनि उनले बताए ।
तिनपाटनका ६ जनालाई होम क्वारेन्टाईनमा
तिनपाटन गाउँपालिका वडा नं. १ वेलघारीले विदेशबाट आएका ६ जनालाई होम क्वारेन्टाइनमा राखेको छ । होम क्वारेन्टाइनमा रहेका व्यक्तिहरुको नियमित रुपमा स्वास्थ्य जाँच भै रहेको वडा अध्यक्ष गोविन्द राउतले बताए ।
वडामा विदेशबाट आएका व्यक्तिहरुको पहिचान गरि उनीहरुको नियमित चेकजाँच भै रहेको उनले बताए । हालसम्म कसैमा पनि कोरोनाको शंका गरिएको छैन र उनीहरुको स्वास्थ्य अवस्था सामान्य रहेको उनले बताए ।
होम क्वारेन्टाइन कहाँ कति ?
कमलामाई नगरपालिकामा १० जना, दुधौली नगरपालिकामा ३६ जना, हरिहरपुरगढी गाउँपालिकामा २, घ्याङलेखमा १जना, फिक्कल गाउँपालिका ७ जना, सुनकोशी गाउँपालिकामा ३ जनालाई होम क्वारेन्टाईनमा राखिएको स्थानीय तहले जनाएका छन । उनीहरुले विशेष गरि विदेशबाट आएकाहरुलाई निगरानी गर्ने क्रममा होम क्वारेन्टाईनमा स्वास्थ्य सुविधा सहित निगरानीमा राखेका हुन ।
जिल्ला प्रशासन कार्यालय सिन्धुली भने यो विषयमा अनविज्ञ छ । जिल्ला प्रशासन कार्यालयले सबै स्थानीय तहलाई होम क्वारेन्टाईनमा रहेकाको विवरण तथा स्थानीय तहमा आएका नयाँ व्यक्तिहरुको रेकर्ड माग गरि पत्राचार गरेको भए पनि स्थानीय तहहरुले विवरण नपठाईसकेको कार्यालयका सूचना अधिकारी उपेन्द्र न्यौपानेले बताए ।
