सिन्धुली । सिन्धुलीमा सञ्चालित मिडियाले आचारसंहिता उलंघन नगरेको प्रेस काउन्सिल नेपालका सदस्य इश्वरी ओझाले बताए । प्रेस काउन्सिल नेपालले नेपाल पत्रकार महासंघ सिन्धुलीको संयोजनमा सिन्धुलीमाढीमा गरेको पत्रकार आचारसंहिता सम्वाद कार्यक्रममा बोल्दै उनले त्यस्तो बताएका हुन ।
पत्रकार, मिडिया सञ्चालक लगाएतसँग अन्तक्र्रिया गर्दै उनले सिन्धुलीलाई आचारसंहिता पालनामा अब्बल देखाउन पत्रकारहरु लागि पर्न आग्रह समेत गरेका छन । उनले जिल्लाका मिडियाहरुलाई आचारसंहितालाई मुल मन्त्र बनाएर समाचार लेख्न आग्रह गरे । पत्रकारहरुलाई आचारसंहिता भित्र रहेर काम गर्न अनुरोध गर्दै उनले भने, ‘पेशालाई मर्यादित बनाउन सन्तुलित समाचार लेख्न आवश्यक छ । आचारसंहितालाई गायत्री मन्त्र बनाएर काम गर्नुस ।’
प्रेस काउन्सिल नेपालका सदस्य गोविन्द चौलागाईले स्थानीय तहले बनाउने ऐनमा हुने प्रावधानमा ध्यान दिन र सहजीकरण गर्न पत्रकार महासंघ र पत्रकारहरुलाई आग्रह गरे । उनले साना लगानीका मिडियाले प्रेस काउन्सिलले सधै संरक्षण गर्ने प्रतिवद्धता समेत व्यक्त गरेका छन । उनले आचारसंहितालाई ध्यान दिदै सत्य र निष्पक्ष समाचार लेख्न पनि पत्रकारहरुलाई आग्रह गरेका छन ।
कार्यक्रममा जिल्लाका पत्रकारहरुले वर्गिकरणमा आएको समस्या, रेडियो, अनलाईन वर्गिकरण गर्नुपर्ने, स्वरोजगार मिडियालाई काम गर्न सहज वातावरण तयार गर्नुपर्ने, लोककल्याणकारी विज्ञापनको भुक्तानीलाई सहज बनाईनुपर्ने, पत्रपत्रिका नियमन, अनुगमन र तथ्यांक व्यवस्थापनको जिम्मा जिल्ला हुलाक कार्यालय, जिल्ला प्रशासन कार्यालयलाई दिइनुपर्ने लगाएतका सुझाव दिएका थिए । यस्तै मोफसलका मिडिया सञ्चालक तथा पत्रकारलाई क्षमता विकास गर्न काउन्सिलले ध्यान दिनुपर्ने सुझाव समेत दिएका थिए ।
काउन्सिलका सदस्य चौलागाईको अध्यक्षतामा भएको कार्यक्रममा पत्रकार महासंघ सिन्धुलीका अध्यक्ष राजन कार्कीले स्वागत गरेका थिए ।
