सिन्धुली । १३० औं अन्तराष्ट्रिय श्रमिक दिवसका अवसरमा बुधबार कमलामाई नगरपालिका सिन्धुलीमा कार्यरत २० जना र सिन्धुली जिल्ला अस्पताल सिन्धुलीमा कार्यरत १७ जना गरि ३७ जना सरसफाई मजदुरहरुलाई सम्मान गरिएको छ ।
न्युन तलबमा सरसफाई जस्तो महत्वपूर्ण क्षेत्रमा काम गरि योगदान दिएको भनि उनीहरुलाई सम्मान गरिएको हो । उनीहरुलाई पेशागत महासंघ सिन्धुली, नेपाल राष्ट्रिय कर्मचारी महासंघ नेपाल सिन्धुलीले संयुक्त रुपमा सम्मान गरेको हो । श्रम र मानवीय सभ्यताको आधारविन्दु सरसफाई व्यवस्थापनको दायित्व बहन गरि उत्कृष्ट काम गरेको भन्दै उनीहरुलाई सम्मान गरिएको हो ।
कार्यक्रममा प्रदेश नं. ३ का सांसद एवम् नेकपाका केन्द्रीय सदस्य राजन दाहाल, प्रदेश नं. ३ का सांसद प्रदीप कटुवाल, कमलामाई नगरपालिकाका मेयर खड्ग खत्री र सिन्धुली अस्पताल विकास समितिका अध्यक्ष प्रलाद कुमार पोखरेलले संयुक्त रुपमा सम्मान गरेका हुन । मजदुरहरुलाई दोसल्ला र प्रमाणपत्रले सम्मान गरिएको थियो ।
