सिन्धुली । बीपी राजमार्ग आसपासका होटल, रेस्टुरेन्ट तथा खाद्य पसलहरूमा अनुगमन तीव्र बनाईएको छ । दशैंमा विपी राजमार्ग हुँदै यात्रा गर्ने यात्रुहरुलाई स्वच्छ, सुरक्षित र गुणस्तरीय खाद्य पदार्थ उपलब्ध गराउने उद्देश्यले खाद्य प्रविधि तथा गुण नियन्त्रण डिभिजन कार्यालय, सिन्धुलीको अगुवाईमा अनुगमनलाई तिव्र बनाएको हो ।
कार्यालयले जिल्ला अनुगमन समितिसँगको समन्वयमा अनुगमन गरिएको जनाएको छ । जिल्ला अनुगमन समितिको टोलीले सुनकोशी तथा आसपासका क्षेत्रमा खाद्य बजार र होटलहरूको स्थलगत अनुगमन गरेको थियो । केहि समय अघि पनि अनुगमन टोलीले विपी राजमार्ग क्षेत्रमा अनुगमन गरेको थियो ।
मंगलबार सुनकोशी गाउँपालिका, गोलन्जोर गाउँपालिका तथा घ्यांङ्लेख गाउँपालिका आसपासका खाद्य पसल, होटल, रेस्टुरेन्ट र भोजनालय गरी १४ वटा व्यावसायिक प्रतिष्ठानको अनुगमन गरिएको छ ।
अनुगमनका क्रममा केही पसल तथा होटलमा म्याद गुज्रिएका खाद्य वस्तु फेला परेका छन् । त्यस्ता खाद्य वस्तु जफत गरी नष्ट गर्नुका साथै ती व्यवसायीलाई कारवाहि समेत गरिएको छ । सूर्यवंशी किराना पसल सुनकोशीलाई १५ हजार रुपैयाँ, शिव दर्शन होटल एण्ड गेस्ट हाउसलाई ५ हजार रुपैयाँ तथा गंगा जमुना किराना स्टोर घ्याङ्लेखलाई एक लाख रुपैयाँ जरिवाना गरिएको छ ।
अनुगमनका क्रममा सुनकोशी गाउँपालिका–३ स्थित सूर्यवंशी किराना पसलबाट ११ हजार ३३० रुपैयाँ, गोलन्जोर गाउँपालिका–७ स्थित सुनकोशी स्टोरबाट १४० रुपैयाँ, गोलन्जोर गाउँपालिका–७ स्थित शिव दर्शन होटल एण्ड गेस्ट हाउसबाट २२५ रुपैयाँ, गोलन्जोर गाउँपालिका–७ स्थित न्यू सनराइज होटल एण्ड गेस्ट हाउसबाट ५४० रुपैयाँ तथा घ्याङ्लेख गा.पा.१, सिन्धुली स्थित गंगा जमुना किराना स्टोरबाट म्याद गुज्रिएका र लेबल विवरण नभएका १ लाख १८ हजार ८ सय ९० रुपैयाँ बराबरका खाद्य वस्तु नष्ट गरिएको थियो । दुई व्यवसायीलाई अनुगमनकै क्रममा कारवाहि गरिएको थियो भने गंगा जमुना किराना स्टोरलाई बुधबार जिल्ला प्रशासन कार्यालयमा बोलाई जरिवाना गरिएको थियो ।
अनुगमनका क्रममा व्यवसाय दर्ता, खाद्य वस्तुको म्याद, सरसफाइ तथा खाद्य स्वच्छता सम्बन्धी अवस्थाको निरीक्षण गरिएको थियो । व्यवसायीहरूलाई खाद्य स्वच्छताका मापदण्ड पूर्ण रूपमा पालना गर्न, पसल तथा भान्साको सरसफाइमा विशेष ध्यान दिन, मूल्यसूची राख्न र पूर्ण लेबल विवरण भएका खाद्य वस्तु मात्र खरिद तथा बिक्री गर्न निर्देशन दिइएको छ ।
त्यसैगरी होटल तथा भोजनालय सञ्चालकलाई भान्सामा काम गर्दा एप्रोन, मास्क र हेडनेट प्रयोग गर्न, पकाइएका खानेकुरा छोपेर राख्न, शाकाहारी तथा मांसाहारी परिकार छुट्टाछुट्टै राख्न र भान्सामा उचित हावा निकासको व्यवस्था गर्न निर्देशन दिइएको छ ।
बीपी राजमार्ग हुँदै आवतजावत गर्ने यात्रु तथा सर्वसाधारणको खाद्य सुरक्षालाई ध्यानमा राख्दै होटल तथा रेस्टुरेन्टहरुको अनुगमनबाट उपभोक्तालाई सुरक्षित, स्वच्छ तथा गुणस्तरीय खाद्य सामग्री उपलब्ध गराउन व्यवसायीलाई जिम्मेवार बनाउनुका साथै खाद्य स्वच्छता सम्बन्धी नियमको पालना सुनिश्चित गर्न जोड दिइएको छ । उपभोक्तालाई पनि खाद्य सामग्री खरिद गर्दा उत्पादन तथा उपभोग्य मिति, लेबल विवरण र गुणस्तर जाँच गरेर मात्र खरिद गर्न आग्रह गरिएको छ ।
