सिन्धुली । ब्रह्मकुमारी राजयोग उपसेवा केन्द्र सिन्धुलीको आयोजनामा शुक्रबार विश्व बन्धुत्व रक्तदान महाअभियान अन्तर्गत ५५ जनाले रक्तदान गरेका छन् ।
सिन्धुलीमाढीस्थित ओम शान्ति भवन, शिवनगरमा आयोजित रक्तदान कार्यक्रममा स्थानीय नागरिक, सशस्त्र प्रहरी बलका सुरक्षाकर्मी, सिद्ध बाबा गुरुकुल कलेजका विद्यार्थी तथा पत्रकारहरूको उत्साहजनक सहभागिता रहेको थियो ।
कार्यक्रममा रक्तदानको महत्वबारे जानकारी दिँदै ब्रह्मकुमारी संगिता गुप्ताले नियमित रक्तदानले आकस्मिक अवस्थामा बिरामीको ज्यान बचाउन महत्वपूर्ण योगदान पुग्ने भएकाले सबैलाई स्वेच्छिक रक्तदानमा सहभागी हुन आग्रह गरेको बताईन् ।
रक्तदान कार्यक्रमको प्राविधिक सहयोग नेपाल रेडक्रस सोसाइटी, रक्त सञ्चार केन्द्र सिन्धुलीले गरेको थियो । आयोजकका अनुसार संकलित रगत जिल्लाभित्रका आकस्मिक तथा उपचाररत बिरामीहरूको आवश्यकताका लागि उपयोग गरिनेछ ।
स्वेच्छिक रक्तदान मार्फत मानवीय सेवाको भावना प्रवद्र्धन गर्ने उद्देश्य सहित आयोजना गरिएको अभियान सफलतापूर्वक सम्पन्न भएको गुप्ताले बताईन् । ‘रक्तदान गरौं पुण्य कमाऔं, विश्व बन्धुत्वतर्फ एक कदम अघि बढौं’ भन्ने नाराका साथ आयोजना गरिएको कार्यक्रमको मुख्य उद्देश्य मानवता, करुणा र एकताको भाव पैदा गर्नु पनि उनले बताएकी छिन् ।
राजयोगिनी दादी प्रकाशमणी ज्यूको १९ औं पुण्यतिथिको अवसरमा रक्तदानको आयोजना गरिएको हो । यो अभियान अन्तर्गत ज्ञानपान, योगध्यान र रक्तदान कार्यक्रम अघि बढाइएको छ ।
