सिन्धुली । नेपाल पत्रकार महासंघले नेपाल पत्रकार महासंघ सिन्धुली शाखाका सदस्य तथा पत्रकार बुद्ध नेपाली विरुद्ध समाचारका आधारमा जिल्ला प्रशासन कार्यालय सिन्धुलीमा दर्ता गरिएको उजुरीप्रति गम्भीर ध्यानाकर्षण भएको जनाएको छ । महासंघको केन्द्रीय समितिले समाचारलाई फौजदारीकरण गर्ने प्रयास प्रेस स्वतन्त्रतामाथिको हस्तक्षेप भएको बताएका छन् ।
महासंघका अनुसार पत्रकार नेपालीले गत कात्तिक १६ गते प्रकाशित गरेको समाचारलाई आधार बनाएर करिब नौ महिनापछि साउन ७ गते गाउँपालिकाका अध्यक्ष जगतबहादुर भोलनले जिल्ला प्रशासन कार्यालयमा उजुरी दर्ता गराएका थिए । उक्त घटनापछि नेपाल पत्रकार महासंघ सिन्धुली शाखाले यसबारे गम्भिर ध्यानाकर्षण गराएको थियो ।
महासंघको केन्द्रीय समितिले कुनै समाचारप्रति असहमति वा गुनासो भए प्रचलित कानुन तथा संस्थागत संयन्त्रमार्फत समाधान खोज्नुपर्नेमा जोड दिएको छ । समाचारका विषयलाई प्रशासनिक वा फौजदारी प्रक्रियामा लैजाने प्रवृत्तिले संविधानले सुनिश्चित गरेको प्रेस तथा अभिव्यक्ति स्वतन्त्रतालाई कमजोर बनाउने भन्दै महासंघले त्यसको कडा शब्दमा भत्र्सना गरेको छ ।
केन्द्रीय महासचिव रामप्रसाद दाहालद्वारा जारी विज्ञप्तिमा समाचारका विषयलाई फौजदारीकरण नगर्न, प्रेसको संवैधानिक अधिकारको सम्मान गर्न तथा आगामी दिनमा यस्ता गतिविधि दोहोरिन नदिन सम्बन्धित पक्षलाई आग्रह गरिएको छ । समाचारसँग सम्बन्धित विवादलाई कानुनी र संस्थागत प्रक्रियाबाट समाधान गर्नुपर्ने महासंघको धारणा छ ।
