सिन्धुली । फिक्कल गाउँपालिका वडा नं. २ लाई पूर्ण बालमैत्री स्थानीय शासन वडा घोषणा गरिएको छ । बुधबार वडालाई बालमैत्री स्थानीय शासन वडा घोषणा गरिएको हो । बालअधिकार संरक्षण, बालमैत्री सेवा प्रवाह तथा बालमैत्री वातावरण निर्माणका लागि आवश्यक सबै सूचक पूरा गरेपछि वडालाई औपचारिक रूपमा पूर्ण बालमैत्री वडा घोषणा गरिएको हो ।
वडा अध्यक्ष शंकर बहादुर भण्डारीको अध्यक्षता एवम् जिल्ला समन्वय समिति सिन्धुलीका प्रमुख कार्साङ लामाको प्रमुख आतिथ्यतामा वडालाई वालमैत्री वडा घोषणा गरिएको हो ।
कार्यक्रमलाई सम्बोधन गर्दै प्रमुख अतिथि कार्साङ लामाले बालमैत्री स्थानीय शासन घोषणा कुनै औपचारिक उपलब्धि मात्र नभई बालबालिकाको सुरक्षित, सम्मानजनक र अधिकारमैत्री भविष्य सुनिश्चित गर्ने महत्वपूर्ण अभियान भएको बताए । उनले घोषणा पछि पनि सूचकहरूको निरन्तर कार्यान्वयन, अनुगमन र प्रभावकारी सेवा प्रवाहमा विशेष ध्यान दिन आग्रह गर्दै अन्य वडालाई समेत यस अभियानबाट प्रेरणा लिनुपर्ने उल्लेख गरे ।
कार्यक्रममा बोल्दै फिक्कल गाउँपालिका अध्यक्ष पार्वती सुनुवारले बालबालिकाको समग्र विकासलाई स्थानीय सरकारको उच्च प्राथमिकतामा राखिएको बताइन् । उनले बालमैत्री वातावरण निर्माणका लागि शिक्षा, स्वास्थ्य, पोषण, सरसफाइ, सुरक्षित खानेपानी तथा बाल सहभागितालाई गाउँपालिकाले योजनावद्ध रूपमा अघि बढाएको उल्लेख गर्दै सबै वडालाई पूर्ण बालमैत्री स्थानीयशासन घोषणा गर्ने लक्ष्य रहेको जानकारी दिइन् ।
उपाध्यक्ष राजु बरालले बालबालिकामाथिको लगानी भविष्यप्रतिको लगानी भएको उल्लेख गर्दै बालअधिकार संरक्षणमा अभिभावक, विद्यालय, समुदाय र स्थानीय सरकारबीच सहकार्य आवश्यक रहेको बताए ।
प्रमुख प्रशासकीय अधिकृत डम्बरबहादुर रजन मगरले घोषणा गरिएको अवस्थालाई दीगो बनाउँदै बालमैत्री सेवा प्रवाहलाई अझ प्रभावकारी बनाइने प्रतिवद्धता व्यक्त गरे । फिक्कल गाउँपालिका वडा नं. २ ले बालमैत्री स्थानीय शासन कार्यविधि अनुसार आवश्यक ५१ वटा सूचक पूरा गरेपछि जिल्ला समन्वय समिति तथा सम्बन्धित सरोकारवाला निकायबाट स्थलगत अनुगमन, मूल्याङ्कन र स्वीकृतिपछि वडालाई पूर्ण बालमैत्री स्थानीय शासन वडा घोषणा गरिएको हो ।
कार्यक्रममा बालमैत्री वडा घोषणा प्रक्रियालाई सफल बनाउन योगदान पु¥याउने विभिन्न संघसंस्था, स्थानीय क्लब, शिक्षक तथा विद्यार्थीहरूलाई सम्मान गरिएको थियो । साथै वडाभित्रका विभिन्न विद्यालयका विद्यार्थीहरूले सांस्कृतिक नृत्य प्रस्तुत गरी कार्यक्रमलाई थप आकर्षक बनाएका थिए ।
