ललितपुर/ उच्च अदालत बार एसोसिएशन, पाटनले वैदेशिक रोजगार न्यायाधिकरण परिसरमा मुद्दाको पैरवी गरी बाहिरिने क्रममा अधिवक्ता चन्द्रप्रसाद आचार्यमाथि भएको दुर्व्यवहार तथा हातपातको प्रयासप्रति गम्भीर ध्यानाकर्षण भएको जनाएको छ।
एसोसिएशनले मंगलबार विज्ञप्ति जारी गर्दै अधिवक्ता आचार्यले आफ्नो पक्षको प्रतिनिधित्व गर्दै पेशागत आचारसंहिताअनुसार बहस–पैरवी गरी न्यायाधिकरणबाट बाहिरिने क्रममा अपरिचित व्यक्तिहरूको समूहले गालीगलौज गर्दै अभद्र व्यवहार र भौतिक आक्रमणको प्रयास गरेको उल्लेख गरेको छ।
विज्ञप्तिमा कानुन व्यवसायी आफ्नो पेशागत दायित्व निर्वाह गर्ने क्रममा असुरक्षित हुनुपर्ने अवस्था सिर्जना हुनु दुःखद भएको भन्दै घटनाको घोर निन्दा, भर्त्सना तथा खेद व्यक्त गरिएको छ।
बार एसोसिएशनले लोकतन्त्र, कानुनी शासन र पेशागत मर्यादाको संरक्षणका लागि यस्ता घटनाको सत्यतथ्य छानबिन गरी दोषीमाथि कानुनबमोजिम अविलम्ब कारबाही गर्न सम्बन्धित निकायसँग माग गरेको छ।
यस्तै, आगामी दिनमा यस्ता घटना दोहोरिन नदिन तथा कानुन व्यवसायीले सुरक्षित र निर्भीक वातावरणमा आफ्नो पेशा सञ्चालन गर्न पाउने सुनिश्चितताका लागि नेपाल सरकार, सर्वोच्च अदालत प्रशासन, वैदेशिक रोजगार न्यायाधिकरण, सम्पूर्ण अदालत प्रशासन, नेपाल बार एसोसिएशन र नेपाल बार काउन्सिललगायत सरोकारवाला निकायको गम्भीर ध्यानाकर्षण गराइएको विज्ञप्तिमा उल्लेख छ।
उच्च अदालत बार एसोसिएशन, पाटनका सचिव अधिवक्ता प्रवल शर्माद्वारा हस्ताक्षरित उक्त विज्ञप्ति २०८३ असार ३१ गते सार्वजनिक गरिएको हो।
