सिन्धुली । नेपाल पत्रकार महासंघ बागमती प्रदेशले प्रदेश रजिष्टारको कार्यालय बागमती प्रदेशमा दर्ता भएका अनलाईन सञ्चारमाध्यमहरु र पत्रकारहरुले लिएका प्रेस पासको नविकरण नगरेमा वा उचित निकास नदिएमा आन्दोलन गर्ने चेतावनी दिएको छ । महासंघले मंगलबार प्रेस विज्ञप्ति जारी गर्दै कानुनको अन्यौलता देखाई प्रदेश मातहतमा दर्ता भएका अनलाईन सञ्चारमाध्यमको नविकरण र प्रेस पास नविकरण नगरे आन्दोलन गर्ने चेतावनी दिएको हो ।
महासंघ बागमती प्रदेश समितिका अध्यक्ष कृष्ण सारु मगरद्वारा जारी गरिएको विज्ञप्तीमा प्रदेश मातहतका ३२७ अनलाईन सञ्चारमाध्यम नविकरण रोकिएको छ । त्यस्तै प्रदेश रजिष्टारको कार्यालयबाट जारी गरिएका १३ सय बढी प्रेसपास नविकरण हुन नसकेको उल्लेख गरिएको छ ।
महासंघले बागमती प्रदेश सरकार अन्तर्गत सञ्चार रजिष्ट्रारको कार्यालयमा दर्ता भएका अनलाईन सञ्चार माध्यम र बागमती प्रदेशबाट प्रेस पास लिएका पत्रकारको नविकरण रोकिएकोप्रति महासंघले गम्भिर ध्यानाकर्षण भएको विज्ञप्ती मार्फत जनाएको हो ।
महासंघले विज्ञप्तीमा भनेको छ, ‘नयाँ आर्थिक वर्ष २०८३÷८४ सुरु हुनै लाग्दा समेत अनलाईन सञ्चार माध्यमबारे अन्यौलता जारी छ । जारी अन्यौलतालाई तत्काल अन्त्य गर्दै सञ्चार रजिष्ट्रार कार्यालयमा दर्ता भएका ३२७ अनलाईन सञ्चार माध्यम र उक्त सञ्चार माध्यहरुमा कार्यरत पत्रकारहरुको प्रेस पास नविकरणको वातावरण निर्माणको लागि संघीय सूूचना तथा सञ्चार मन्त्रालय, बागमती प्रदेश सरकार, आन्तरिक मामिला तथा कानून मन्त्रालय र सञ्चार रजिष्ट्रारको कार्यालयको ध्यानाकर्षण गराउँदछौं ।’
प्रदेश कानून वमोजिम दर्ता भएका संस्था नविकरण नगर्दा यस्ता संस्थाको मौलिक हक हनन हुने भएकोले मौलिक हकको संरक्षण गर्न पनि प्रदेश सरकारले जिम्मेवारी बोध गरेर नविकरणको निर्णय लिन महासंघले माग गरेको छ ।
संघीय ऐन तथा नियमावलीले प्रदेश कानून बमोजिम दर्ता भएका अनलाइन सञ्चार माध्यम नविकरण गर्ने सम्वन्धमा स्पष्ट रुपमा कुनै रोक नलगाएको अवस्था तथा संघीय कानूनले समेत यस्ता संस्थाको वारेमा कुनै पनि सम्वोधन नगरेको वा वचाउ नगरेको उल्लेख गर्दै अनलाईन सञ्चार माध्यम नविकरण गर्न आवश्यक व्यवस्था मिलाउन बागमती प्रदेश सरकारलाई महासंघले आग्रह गरेको छ ।
‘संघीय कानूनमा संशोधन वा परिमार्जन पर्खेर बसेको बागमती प्रदेश सरकार र संघीय सरकारबीचको अन्यौलताका कारण सञ्चार रजिष्ट्रारको कार्यालयमा दर्ता भएका अनलाईन सञ्चार माध्यम र ती सञ्चार माध्यममा कार्यरत पत्रकारले लिएका प्रेस पास नविकरण रोकिनु दुखद कुरा हो ।’ महासंघले भनेको छ ।
प्रदेश सञ्चार माध्यम व्यवस्थापन ऐन २०७५ र नियमावली २०७६ को नियम १७ वमोजिम दर्ता भएका अनलाईन सञ्चार माध्यम नविकरण गर्न अव दुई दिन मात्र बाँकी रहँदा महासंघले सञ्चालनमा रहेका अनलाइन सञ्चार माध्यमलाई नविकरण गर्न नदिई अन्यौलमा राख्ने कार्य नेपालको संविधानको धारा १७ को उपधार २ को खण्ड (घ) को मौलिक हकको अधिकार र कानुन विपरित हुने समेत उल्लेख गरेको छ ।
संविधान र कानुन बमोजिम कुनै पनि संस्था दर्ता गरी सकेपछि नविकरण नगरि राख्दा उक्त संस्थाको वैधानिकतामा समेत प्रश्न उठ्ने अवस्थामा प्रदेश सरकार अनिर्णयको वन्दि बनि रहन नमिल्ने समेत महासंघले उल्लेख गरेको छ ।
महासंघले प्रदेशमा दर्ता भएका अनलाईन सञ्चार माध्यमको प्रदेशमा नविकरण नहुने र संघ सरकारले पनि स्वामित्व नलिने गरेको उल्लेख गर्दै नेपालको संविधान २०७२ को मौलिक हकको अधिकार रक्षाको लागि महासंघ संघर्षमा उत्रन बाध्य हुने समेत विज्ञप्ती मार्फत जनाएको छ ।
