सिन्धुली/कमलामाई नगरपालिकाले स्मार्ट अपांगता परिचयपत्र वितरण कार्य सुरु गरेको छ । नेपाल सरकारको सामाजिक सूचना व्यवस्थापन प्रणाली मार्फत नगरपालिकाले आधुनिक प्रविधिमा आधारित स्मार्ट अपांगता परिचयपत्र वितरणको सुरु गरेको हो । विहिबार अति अशक्त अपांगता भएका ४ जना, मध्यम अपांगता भएका १ जना र प्रतिलिपी परिचयपत्र ५ वटा गरि ९ वटा परिचयपत्र वितरण गरिएको कमलामाई नगरपालिकाका प्रमुख प्रशासकीय अधिकृत किरणनीधि तिवारीले बताए ।
उनका अनुसार नगरपालिकाले जिल्लामै पहिलो पटक स्मार्ट अपांगता परिचयपत्र वितरण कमलामाई नगरपालिकाले सुरु गरेको हो । नगर उपप्रमुख मञ्जु देवकोटाको अध्यक्षतामा आयोजित एक कार्यक्रमका बीच अपांगता भएका व्यक्तिहरुलाई परिचय पत्र वितरण गरिएको हो ।
स्मार्ट अपांगता परिचयपत्र आधुनिक डिजिटल प्रविधिमा आधारित भएकाले लाभग्राहीको विवरण सुरक्षित रूपमा अभिलेखीकरण हुने व्यवस्था गरिएको छ । यसले परिचयपत्रको विश्वसनीयता बढाउनुका साथै नक्कली परिचयपत्रको सम्भावना न्यून गर्ने, तथ्यांक सुरक्षित राख्ने, आवश्यक पर्दा छिटो प्रमाणीकरण गर्न सकिने तथा सेवा प्रवाहलाई थप प्रभावकारी, पारदर्शी र व्यवस्थित बनाउन सहयोग पुग्ने तिवारीले बताए ।
कार्यक्रममा बोल्दै नगर उपप्रमुख देवकोटाले सूचना प्रविधिको अधिकतम उपयोग गर्दै नागरिकमैत्री, पारदर्शी र प्रभावकारी सेवा प्रवाहलाई नगरपालिकाले प्राथमिकतामा राखेको बताइन् ।
स्मार्ट अपांगता परिचयपत्र वितरणले अपांगता भएका नागरिकको सम्मान, पहिचान र सेवामा पहुँचलाई थप सहज र सुरक्षित बनाउने उपप्रमुख देवकोटाले बताईन् । आगामी दिनमा अन्य सेवा समेत क्रमशः डिजिटल प्रणालीमा रूपान्तरण गर्दै सुशासन प्रवद्र्धन गरिने बताइन् ।
त्यसैगरी कार्यक्रममा बोल्दै प्रमुख प्रशासकीय अधिकृत किरणनीधि तिवारीले डिजिटल प्रणाली मार्फत परिचयपत्र वितरण हुँदा तथ्यांक व्यवस्थापन थप व्यवस्थित, सुरक्षित र विश्वसनीय हुने बताएका छन् । यसबाट प्रशासनिक कार्यमा पारदर्शिता, अभिलेख व्यवस्थापनमा सहजता तथा सेवा प्रवाहमा गति आउने उनको भनाइ थियो । प्रविधिमैत्री सार्वजनिक सेवा विस्तारका लागि नगरपालिका निरन्तर प्रतिवद्ध रहेको उनले बताए ।
उक्त प्रणाली मार्फत लाभग्राहीहरूको अभिलेख एकीकृत रूपमा व्यवस्थापन हुने भएकाले भविष्यमा विभिन्न सामाजिक सुरक्षा तथा सरकारी सेवासँग सहज रूपमा आवद्ध गर्न सकिने आधार समेत तयार भएको छ । कार्यक्रममा प्रमुख प्रशासकीय अधिकृत, सामाजिक विकास शाखा प्रमुख, महिला, बालबालिका तथा समाज कल्याण शाखा प्रमुख, सूचना प्रविधि शाखा प्रमुख, अपांगता परिचयपत्र वितरण समितिका सदस्य, सम्बन्धित शाखाका कर्मचारी तथा अन्य सरोकारवालाको उपस्थितिमा प्रणालीबाट कार्ड तयार गरी लाभग्राहीलाई स्मार्ट परिचयपत्र वितरण गरिएको नगरपालिकाले जनाएको छ ।
