सिन्धुली । तिनपाटन गाउँपालिका वडा नं. ३ बालमैत्री वडा घोषणा भएको छ । विहिबार एक औपचारिक कार्यक्रमका बीच बालमैत्री वडा घोषणा गरिएको हो । प्लान इन्टरनेशनल नेपाल र जनजाती समाज विकास कार्यक्रम सिन्धुलीको सहजीकरणमा बालबालिकाको अधिकार, संरक्षण, सहभागिता तथा समग्र विकासलाई सुनिश्चित गर्ने उद्देश्यले आवश्यक सूचकहरू पूरा गरेपछि उक्त वडालाई बालमैत्री वडा घोषणा गरिएको हो ।
वडा अध्यक्ष लाल बहादुर स्याङ्तानको अध्यक्षता एवम् जिल्ला समन्वय समितिका प्रमुख कार्साङ लामाको प्रमुख आतिथ्यतामा वडा नं. ३ को जोगेमा भएको कार्यक्रममा वडालाई बालमैत्री घोषणा गरिएको हो ।
वडा अध्यक्ष अध्यक्ष लाल बहादुर स्याङ्तानले बालमैत्री स्थानीय शासनका विभिन्न सूचकहरू पूरा गर्दै वडा नं. ३ ले बाल अधिकार संरक्षण, शिक्षा, स्वास्थ्य, सरसफाइ, जन्मदर्ता तथा बाल सहभागिताका क्षेत्रमा उल्लेखनीय प्रगति हासिल गरेपछि बालमैत्री वडा घोषणा गरिएको बताए ।
कार्यक्रममा बोल्दै जिल्ला समन्वय समितिका प्रमुख कार्साङ लामाले बालबालिकाको सर्वागिण विकासका लागि स्थानीय तह, समुदाय, विद्यालय तथा अभिभावकको साझा जिम्मेवारी रहेको बताएका छन् । कार्यक्रमका अवसरमा बालमैत्री वडा निर्माणमा सहयोग पु¥याउने व्यक्ति तथा संस्थाहरूलाई सम्मान समेत गरिएको थियो ।
कार्यक्रममा जिल्ला समन्वय समितिका उपप्रमुख शान्ता कार्की, गाउँपालिका अध्यक्ष कर्ण बहादुर थापा, उपाध्यक्ष अशोक पुलामी, प्रमुख प्रशासकीय अधिकृत मनोज साह तथा जनप्रतिनिधिहरू, विभिन्न संघसंस्थाका प्रतिनिधि, शिक्षक, अभिभावक, बालबालिका तथा स्थानीयवासीहरूको सहभागिता रहेको थियो ।
सहभागीहरूले बालमैत्री वातावरणको निरन्तरता र दिगोपनाका लागि सबै पक्षले प्रतिबद्ध भएर काम गर्नुपर्नेमा जोड दिएका थिए ।
