सिन्धुली । जिल्लाको सदरमुकाम क्षेत्रमा खानेपानी वितरण गरिरहेको सिद्धेश्वर खानेपानी तथा सरसफाई उपभोक्ता संस्थाले वितरण गरेको पानीमा दिसामा पाईने जिवाणु कोलिफर्म भेटिएको छ ।
कमलामाई नगरपालिकाले गरेको पानीको परिक्षणमा सिद्धेश्वर खानेपानी उपभोक्ता संस्थाले सदरमुकाम सिन्धुलीमाढीका तीनवटा वडामा वितरण गरेको पानीमा कोलिफर्मका जिवाणु भेटिएको कमलामाई नगरपालिका सिन्धुलीका सूचना अधिकारी सागर कुमार ढकालले बताएका छन ।
उनका अनुसार नगरपालिकाले केहि दिन अगाडि टोल विकास संस्थाका प्रतिनिधिहरु मार्फत पानीको परिक्षणका लागि संकलन गरिएको नमुनामा अत्यधिक मात्रामा कोलिफर्म भेटिएको हो । गडौली खोला र ग्वाँङखोलाको मुहानबाट ल्याईएको पानीमा कोलिफर्म भेटिएको सूचना अधिकारी ढकालले बताएका छन ।
नगरपालिकाले किट वितरण गरेर उपभोक्ता मार्फत परिक्षण गराएको थियो । सबै नमुनाको रिपोर्ट नआईसकेको तर परिक्षणको जति नमुनाको रिपोर्ट आएको छ त्यसमा अत्यधिक कोलिफर्म रहेको देखिएको रिपोर्टिङ प्राप्त भईरहेको ढकालले बताए । वितरण गरिएका नमुनामा इनारका पानीमा भने समस्या नदेखिएको उनले बताए । नगरपालिकाले ५ सय १९ वटा नमुना परिक्षण गरेको थियो ।
सिद्धेश्वर खानेपानी तथा सरसफाई उपभोक्ता संस्थाका अध्यक्ष घनश्याम देवकोटाले नगरपालिकाले खानेपानी जाँच गर्दा संस्थासँग समन्वय नगरेको बताए । उनका अनुसार २ वटा मुहानबाट ३ हजार घरधुरीले पानी खाँदै आएका छन । संस्थाले ३, ३ महिनामा खानेपानीको गुणस्तर जाँच गर्दै आएको तर हालसम्म कतै पनि कोलिफर्म नभेटिएकोमा यस्तो प्रतिवेदनले आफुहरु चकित परेको समेत बताएका छन । हामीले मुहान, फिल्टर ट्यांकीमा शुद्धिकरण समेत गरिरहेको देवकोटाले बताए ।
पछिल्लो समय परिक्षणका लागि काठमान्डौ पठाईएको नमुनाको रिपोर्ट प्राप्त हुने बेला भईसकेको पनि उनले जानकारी दिएका छन । खानेपानीको परिक्षणका लागि नमुना संकलन गरि तत्काल परिक्षणका लागि काठमान्डौ लगिने पनि उनले जानकारी दिए ।
तस्वीरहरु : पुरानो फाइलबाट
