सिन्धुली । तीन दिने रैथाने कृषि उपज तथा मौलिक परिकार प्रदर्शनी मंगलबार सिन्धुलीमाढीमा सुरु भएको छ । चौथो राष्ट्रिय कृषि जैविक विविधता दिवस २०८२ को अवसरमा कृषि विकास कार्यालय सिन्धुलीले उक्त प्रदर्शनी सुरु गरेको हो ।
कृषि जैविक विविधताको संरक्षण गर्न, पूर्खाले संरक्षण गरि ल्याएका स्थानीय बिउबिजन हराउन नदिन, जैविक विविधताको संरक्षणमा परम्परागत ज्ञान दिन र स्वदेशी प्रविधिको महत्व बढाउने उद्देश्य सहित प्रदर्शनी सुरु गरिएको कृषि विकास कार्यालय सिन्धुलीका कृषि प्रसार अधिकृत उमादेवी श्रेष्ठले बताईन ।
तीनदिनसम्म चल्ने प्रदर्शनीमा मौलिक खाद्य परिकार प्रदर्शनी तथा सेवन, रैथाले बालीको उत्पादन, सम्वद्र्धन र प्रवद्र्धनमा क्रियाशिल कृषक तथा उद्यमीलाई सम्मान गर्ने कार्यक्रम राखिएको छ भने रैथाने तथा स्थानीय कृषि उपजको प्रदर्शनी तथा विक्री स्टल समेत राखिएको छ ।
प्रदर्शनीको उद्घाटन जिल्ला समन्वय समिति सिन्धुलीका प्रमुख कारसाङ लामाले गरेका छन् । कार्यक्रममा उपस्थित अतिथि तथा सहभागिहरुले विभिन्न रैथाने परिकारको स्वाद समेत लिएका छन् । कृषि जैविक विविधता, हाम्रो अमुल्य सम्पदा सरंक्षण उपयोग र प्रवर्दनमा युवा सहभागिता भन्ने नारा सहित रैथाने कृषि उपज तथा मौलिक परिकार प्रर्दशनी गरिएको हो ।
उक्त प्रदर्शनीमा सौगाात लघु उद्यम सहकारी संस्था, कृषि तथा पशुपंक्षि विकास मन्त्रालय बागती प्रदेश हेटौँडा र वागवानी विकास केन्द्र सिन्धुलीको सहकार्य रहेको छ ।
कृषि विकास कार्यालय सिन्धुलीका कार्यालय प्रमुख अनुप अधिकारीको अध्यक्षता तथा जिल्ला समन्वय समिति सिन्धुलीका प्रमुख कारसाङ लामाको प्रमुख आतिथ्यतामा सुरु भएको प्रदर्शनीमा बोल्दै लामाले रैथाने बाली हाम्रो गाउँ, ठाउँ र संस्कारसँग जोडिएकाले त्यसको संरक्षण आवश्यक रहेको बताए । उनले स्थानीय सरकार, प्रदेश सरकार र संघिय सरकारले रैथाने बालीको संरक्षण गर्नु पर्नेमा जोड दिए । आधुनिकिकरण सँगसँगै परम्परागत शैलीलाई पनि ध्यान दिन आवश्यक रहेको उनले बताए ।
जिल्ला समन्वय समिति सिन्धुलीकी उपप्रमुख शान्ता कार्कीले रैथाने बालीलाई आयश्रोतको माध्यम बनाउनुपर्नेमा जोड दिईन । बजारका परिकार खरिदलाई कम गर्दै रैथाने बाली उत्पादन र खरिदमा जोड दिनुपर्ने उनको भनाई छ ।
कार्यक्रमका बोल्दै कृषि विकास कार्यालय सिन्धुलीका प्रमुख अनुप अधिकारीले कृषिमा व्यवसायीकरण,आधुनिकिरण र हाइब्रिड बिउबिजनले गर्दा रैथाने बाली लोप हुन गएको बताए । उनले नेपालमा ४० प्रतिशत रैथाने बाली लोप भईसकेको बताए । अधिकारीले पछिल्लो समय हाइब्रिड बिउबिजन सगँसगँै रैथाने बालीको संरक्षण गर्नुपर्नेमा जोड दिए ।
त्यस्तै वागवानी विकास केन्द्रका अध्यक्ष आशिष श्रेष्ठले आधुनिक कृषि प्रणाली र जलवायु परिर्वतनको कारण रैथाने बाली उत्पादनमा कमी हुँदै आएको बताए । उनले आधुनिक जीवन शैलीका कारण रैथाने बाली लोप हुन पुगेको र यसको विकास, प्रचार, प्रसार र प्रवद्र्धनमा समेत ध्यान नपुगेको बताए ।
कार्यक्रमको सहजीकरण कृषि विकास कार्यालय सिन्धुलीका कृषि प्रसार अधिकृत उमादेवी श्रेष्ठले गरेकी थिइन भने सौगाात लघु उद्यम सहकारी संस्थाका अध्यक्ष बिमला थापाले स्वागत गरेकी थिईन ।
