सिन्धुली । कमलामाई नगरपलिकाको आयोजनामा सिन्धुलीमाढीमा सम्पन्न छैठौं मेयर तथा उपमेयर कप खेलकुद प्रतियोगिता २०८२ का विजेता तथा उपविजेताहरुलाई सोमबार पुरस्कार वितरण गरिएको छ ।
कमलामाई नगरपालिकाका नगर खेलकुद विकास समितिका अध्यक्ष लोक विक्रम थापाको अध्यक्षता तथा कमलामाई नगरपालिकाका मेयर उपेन्द्र कुमार पोख्रेलको प्रमुख आतिथ्यतामा कार्यक्रमको समापन तथा पुरस्कार वितरण गरिएको हो ।
स्वास्थ्यका लागि खेलकुद, राष्ट्रको लागि खेलकुद भन्ने मुल नाराका साथ शुक्रबारदेखि सञ्चालन भएको मेयर तथा उपमेयर कप खेलकुद प्रतियोगिता सोमबार समापन गरिएको हो ।
कार्यक्रमको समापनमा बिजेता खेलाडीहरुलाई नगद पुरस्कार सहित शिल्ड, मेडल र प्रमाणपत्र वितरण गरिएको छ । मेयर÷उपमेयर कप खेलकुद भलिबल प्रतियोगितामा प्रथम हुने टिमलाई नगद ५० हजार सहित शिल्ड, मेडल र प्रमाणपत्र वितरण गरिएको छ । दोस्रो हुने टिमलाई नगद ३० हजार र तेस्रो हुने टिमलाई नगद १५ हजार सहित शिल्ड, मेडल र प्रमाणपत्र वितरण गरिएको छ ।
मेयर कप भलिबल प्रतियोगितामा कमलामाई नगरपालिका वडा नं १० ले प्रथम स्थान हासिल गरेको थियो । आईतबार वडा नं १ र वडा नं १० बिच भएको फाइनल खेलमा वडा नं १ लाई हराउँदै वडा नं १० विजेता बनेको थियो । वडा नं १ उपविजेता बनेको छ । वडा नं ११ र वडा नं ७ बिच भएको खेलमा वडा न. ७ विजय भएको थियो ।
यस्तै उपमेयर कप खेलकुद प्रतियोगिता अन्तर्गत भएको भलिबल प्रतियोगितामा सुर्योदय इङ्लिस बोर्डिङ स्कुल विजेता भएको थियो भने सिद्वबाबा इङ्सि बोर्डिङ द्वितिय र सिद्वबाबा+२ होटल म्यानेजमेन्टले तृतिय स्थान हासिल गरेको थियो । मेयर तथा उपमेयर कप खेलकुद प्रतियोगितामा कराँते प्रतियोगिता, तेक्वान्दो प्रतियोगिता र भलिबल प्रतियोगिता सञ्चालन भएका थिए ।
जसमा कराँते प्रतियोगितामा सय जना खेलाडिले मेडल र प्रमाणपत्र प्राप्त गरेका छन् भने तेक्वान्दोमा १ सय ३५ जना खेलाडिले मेडल र प्रमाणपत्र प्राप्त गरेका छन् ।
