सिन्धुली । महिला हिंसाका घटनामा छिटो र प्रभावकारी न्यायको व्यवस्था गर्न माग गर्दै अखिल नेपाल महिला संघ सिन्धुलीले विहिबार गृहमन्त्रीलाई ज्ञापनपत्र बुझाएको छ । अखिल नेपाल महिला संघ सिन्धुलीले प्रमुख जिल्ला अधिकारी भरत खनाल मार्फत गृह मन्त्रीलाई ज्ञापन पत्र बुझाएको हो ।
अमेसंघले देशभरका प्रमुख जिल्ला अधिकारीहरु मार्फत एकै पटक गृहमन्त्रालयलाई उक्त ज्ञापन पत्र बुझाएको हो । ज्ञापनपत्रमा महिला विरुद्ध हुने हिंसाको तथ्यांक भयावह भएको र न्याय सम्पादन, अनुसन्धान लगाएतका काममा ढिलासुस्ती भईरहेको समेत उल्लेख गरिएको छ ।
ज्ञापनपत्रमा महिला विरुद्ध हुने हिंसा न्युनिकरण र नियन्त्रणका लागि संवैधानिक र कानुनी व्यवस्था रहे पनि अनुसन्धान प्रक्रियामा भएको ढिलासुस्ती र कानुन कार्यान्वयनमा आएको उदासिनताले पीडितले न्याय पाउन नसकेको उल्लेख गरिएको छ ।
ज्ञापनपत्रमा भनिएको छ, ‘घर, विद्यालय, कार्यालय, सार्वजनिक स्थल कतै पनि महिला तथा किशोरीहरुले सुरक्षाको अनुभूति गर्न पाएका छैनन ।’ महिला हिंसाका घटना बढ्दै जाँदा समाज र देशको विकास समेत नहुने उल्लेख गरिएको छ ।
ज्ञापनपत्रमा महिला हिंसाका घटनाको नियन्त्रण गर्नका लागि प्रभावकारी कदम चाल्न, घटना नघट्ने वातावरण बनाउन र घटना घटेको खण्डमा छिटो र प्रभावकारी न्यायका लागि आवश्यक कदम चाली अपराधीलाई उचित दण्ड, पीडितलाई न्यायको व्यवस्था गर्न समेत माग गरिएको छ ।
अखिल नेपाल महिला संघ सिन्धुलीका अध्यक्ष पार्वती भट्टराईको नेतृत्वमा रहेको अनेमसंघको टोलीले जिल्ला प्रशासन कार्यालयमा पुगि प्रमुख जिल्ला अधिकारी भरत खनाललाई ज्ञापनपत्र बुझाएका हुन । प्रजिअ खनालले उक्त ज्ञापनपत्र गृह मन्त्रालयमा पठाउने र महिला हिंसा नियन्त्रण र न्यायका लागि सक्दो सहयोग गर्ने बताए ।
