सिन्धुली । राष्ट्रिय गौरवको आयोजना सुनकोशी मरिण डाईभर्सन बहुउद्देश्यीय आयोजनाको सुरुङ निर्माणको काम छैटौं पटक अवरुद्ध भएको छ । ४५ दिनदेखि सुख्खा धुलो पहिरो र हिलोका कारण टिविएम मेसिनले सुरुङ खन्ने काम गर्न नसकेको आयोजनाले जनाएको छ । टिविएम मेसिन मसिनो लेसिलो धुलो र हिलोले चारैतिरबाट जाम भएको आयोजना प्रमुख मित्र बरालले जानकारी दिएका छन ।
यस अघि तेस्रो पटक ९ दशमलब २२७ किलोमिटरमा सबैभन्दा लामो समय आयोजनाको काम ५६ दिन अवरुद्ध भएको थियो । आयोजनाले मंगलबार सिन्धुलीमाढीमा पत्रकार सम्मेलन गर्दै आयोजनाको प्रगति र काममा आएको समस्याको बारेमा छलफल समेत गरेको छ ।
पत्रकारहरुसँग छलफल गर्दै सुनकोशी मरिण डाईभर्सनको सुरुङ निर्माणमा समस्या आएको आयोजना प्रमुख मित्र बरालले जानकारी दिएका छन । मंसिर ११ गते अवरुद्ध भएको टनेल निर्माणको काम २४ मिटर खनेपछि पुस ९ गते पुन ः अवरुद्ध भएको बरालले जानकारी दिएका छन । अढाई महिनाको अवधिमा ५६ मिटर मात्र सुरुङ निर्माण सम्पन्न भएको छ ।
चौथो पटक एकदिन, पाँचौ पटक २५ दिन सुरुङ निर्माणको काम अवरुद्ध भएको थियो । पुस ९ गतेसम्म आयोजनाको सुरुङ निर्माणको काम १० दशमलब ५४५ किलोमिटर सकिएको छ । मेसिनको दुवै पट्टिबाट वाईपास निर्माणको काम भईरहेको छ । केमिकलको प्रयोग, वाईपास निर्माण जस्ता काम गर्दा समेत धुलो र हिलो सहितको पहिरो खस्ने क्रम नरोकिएपछि अन्तराष्ट्रिय विज्ञहरुको सहायता लिइएको समेत आयोजना प्रमुख बरालले जानकारी दिएका छन ।
बरालले सुरुङका विज्ञहरु रविन्स अमेरिका, स्मेक अष्ट्रेलिया र चाईना कोभेक्सका विज्ञहरुको सहायतामा सुरुङको अवरोध हटाउने प्रयास थालिएको जानकारी दिए । एक सातादेखि उनीहरुले काम सुरु गरेका छन तर सुरुङमा पहिरो नियन्त्रण हुन सकेको छैन । कम्तिमा ९० मिटरसम्म यस्तो समस्या आउने अनुमान गरिएको आयोजनाले जनाएको छ । भौगोलिक समस्या १५० मिटरसम्म रहेको अन्दाज गरिएकोमा २४ मिटर खनि सकिएको छ । अब आयोजनाले विज्ञको सहायतामा टिविएम मेसिनको फोर्स प्रयोग गर्ने छ ।
त्यसपछि पनि समस्या समाधान नभए मान्छेले नै सुरुङ खन्नुको विकल्प नहुन सक्ने आयोजनाले जनाएको छ । मानवीय सहायतामा सुरुङ निर्माण गर्नु परेमा ९० मिटर खन्नका लागि ८, ९ महिना लाग्ने अनुमान गरिएको छ । सोहि दुरी मेसिनबाट खन्नका लागि ३ दिन मात्र लाग्ने छ । भूप्राविधिक प्रतिवेदन भन्दा फरक खालको भौगोलिक संरचना भेटिएकाले भूप्राविधिक आधाररेखा प्रतिवेदन समेत असफल भएको उनले जानकारी दिएका छन ।
