सिन्धुली । बाग्मति प्रदेशका मुख्यमन्त्री शालिकराम जम्मकट्टेलले बाग्मति प्रदेशमा लगानी सम्मेलन गर्ने बताएका छन । उनले बाग्मतिमा हुन सक्ने उद्योग व्यवसायमा लगानी बढाउन बाग्मति प्रदेश सरकारले कार्तिक महिनामा लगानी सम्मेलन गर्ने बताएका हुन । सिन्धुली उद्योग वाणिज्य संघ सिन्धुलीको ३३ औं बार्षिक साधारणसभामा बोल्दै उनले यस्तो बताएका हुन ।
मुख्यमन्त्री जम्मकट्टेलले लगानीको प्राथमिकताको क्षेत्र निर्धारण गरेर लगानीकर्तालाई लगानी गर्न अनुरोध गरिने बताए । जसका लागि उद्योगी व्यवसायीका संस्थाहरुसँग सहकार्य गरिने समेत उनले बताए ।
खाद्यान्नमा बाग्मति प्रदेशका १३ वटै जिल्लालाई आत्मनिर्भर बनाउन सरकार लागि परेको बताए । उनले आफ्नै उत्पादनमा जोड दिएर निर्यात बढाउन नीजि क्षेत्रले सहयोग गर्न आग्रह समेत गरेका छन ।
किसानको उत्पादनलाई बजार नियन्त्रणमा नरहेको बताउँदै सरकारले बजारको व्यवस्था गर्नुपर्ने देखिएको छ । सरकारले उत्पादनसँगै बजारलाई व्यवस्थापन गर्ने सरकारले लिएको बताए ।
उनले सिन्धुली जिल्ला कृषि, पर्यटन, वन पैदावार र सेवा क्षेत्रमा सम्भावना रहेको जिल्ला भएको बताउँदै सिन्धुली जिल्लालाई आत्मनिर्भर बनाउन तर्फ सोंच्न जिल्लाका राजनीतिक नेतृत्व, उद्योगी व्यवसायीलाई आग्रह गरेका छन ।
साधारणसभाको अवसरमा सिन्धुली उद्योग वाणिज्य संघले व्यवसायीक क्षेत्रमा उल्लेख्य योगदान दिने व्यवसायीहरुलाई सम्मान गरेको छ । सम्मानित हुनेमा मैनक्वीन बुटिक फर्मका सञ्चालक रेणु कडेरिया, सृजना कपडा पसका प्रोपाईटर शिवशंकर प्रधानलाई सम्मान गरिएको छ ।
सिन्धुली उद्योग वाणिज्य संघको अध्यक्षतामा भएको कार्यक्रममा बोल्दै प्रतिनिधिसभाका सदस्य श्याम कुमार घिमिरेले नेपालमा लगानीको वातावरण नभएकाले पूँजीको विकास हुन नसकेको बताए । उनले राजनीति, व्यवसायी, जनतामा नै समस्या रहेको बताए । उनले सेवा क्षेत्रको विस्तार गर्दै करको दायरा बढाउन र उत्पादन बढाउन आवश्यक रहेको बताए ।
कार्यक्रममा संविधासभा सदस्य राजन दाहालले उद्योगमैत्री कानुन, लगानीमैत्री वातावरण र उद्योगी व्यवसायीलाई उत्पादनमा उत्साह जगाउनुपर्ने आवश्यकता रहेको बताए ।
कार्यक्रममा बोल्दै बागमती प्रदेश सरकारका आन्तरिक मामिला तथा कानुनमन्त्री गंगानारायण श्रेष्ठले सिन्धुली जिल्लालाई धान उत्पादनको पकेट क्षेत्र बनाएर चामल निर्यात गर्न समेत सकिने बताए ।
कार्यक्रममा बोल्दै प्रमुख जिल्ला अधिकारी सुनिता नेपालले विना इजाजत मदिरा र सुर्तिजन्य पदार्थ सिन्धुलीका व्यवसायीहरुले विक्री वितरण गरेको बताईन । उनले कानुनको अनविज्ञता क्षम्य नहुने भन्दै अनुगमनमा विना इजाजत मदिरा तथा सूर्तिजन्य सामग्री बेचेको पाईएमा कारवाहिको दायरामा ल्याईने बताईन । उनले उद्योग वाणिज्य संघमा सबै उद्योगी व्यवसायीहरु सदस्य नबनेको पाईएको बताउँदै सबै व्यवसायीलाई समेट्न समेत सुझाव दिईन ।
कार्यक्रममा उद्योग वाणिज्य महासंघका नगर जिल्ला उपाध्यक्ष सुरकृष्ण बैद्य, विभिन्न उद्योगी व्यवसायीहरु, नेपाल पत्रकार महासंघका उपाध्यक्ष टिकाजंग थापा, नेपाल रेडक्रस सोसाईटी सिन्धुलीका सभापति अशोक श्रेष्ठ लगाएतले शुभकामना व्यक्त गरेका थिए ।
