सिन्धुली । प्रतिनिधिसभा सदस्य लेखनाथ दाहाल (राजन) ले सहकारीहरुलाई व्यवस्थित बनाउन प्रभावकारी अनुगमन आवश्यक रहेको बताएका छन । उनले सहकारीहरुको अभियानको वार्षिक कार्य योजना बनाएर अघि वढ्न सकेमा सहकारी अभियानले जनस्तरसम्म पुगेर नागरिकको अपेक्षा पुरा गर्न सकिने बताए ।
शनिबार सिन्धुलीमाढीमा आयोजित जिल्ला सहकारी संघ सिन्धुलीको ३० वार्षिक साधारणसभामा बोल्दै दाहालले सहकारीको अभियान बचत तथा ऋणको कार्यक्रम मात्र हुन नहुने र सहकारीको लगानी उत्पादनको क्षेत्रमा हुनु पर्ने बताए ।
उनले जिल्ला सहकारी संघ सिन्धुलीले नौ वटै स्थानीय तहमा प्रभावकारी नेतृत्व तयार गरी अभियान चलाउन आग्रह गरे ।
सहकारीको पूँजी निर्माणमा समान सहभागिता भए जस्तै पूँजी परिचालनमा समेत समान सहभागिता हुनुपर्ने र खबरदारी हुनुपर्ने दाहालले बताए । औद्योगिक पूँजीको विकास गर्न, वृहत्तर रोजगारीको सिर्जना गर्न, आयात घटाउन, निर्यात बढाउन, राष्ट्रिय औद्योगिक पूँजीको विकास गर्न, आफ्नै अर्थतन्त्रको विकास गर्न र जनतालाई उत्पादन र रोजगारसँग जोड्न सहकारी नै पहिलो पाइला भएको उनको भनाई छ । उनले सहकारीले संचालन गर्ने तालिमहरु स्वरोजगार सृजना गर्ने खालको र उत्पादनमा जनताहरु जोडिने खालका हुनुपर्ने सुझाव दिए ।
साधारणसभामा राष्ट्रिय सहकारी महासंघका अध्यक्ष मिनराज कँडेलले केही सहकारीहरुका सञ्चालकहरुको गलत क्रियाकलापका कारण सहकारी अभियानलाई नै वदनाम गरेको उल्लेख गर्दै देशमा हाल ३२ हजार सहकारी संस्थाहरु रहेकोमा जम्मा २ सय सहकारीमा समस्या रहेको उनले वताए । उनले सहकारीका माध्यमबाट देशमा रोजगारी समेत सृजना गर्न सकिने भन्दै उनले झापामा एउटै सहकारी एक हजार एक सय जनालाई रोजगारी दिएको उल्लेख गरे । उनले भक्तपुरको एक सहकारीले देशभरी कार्यक्षेत्र राखेर झण्डै २२ अर्व हिनामिना गरेको घटनाले नागरिकमा सहकारीप्रतिको विश्वास घटाएको बताए ।
‘गुणस्तरीयता, विश्वसनियता एवम सञ्चालन प्रक्रियामा शुद्धता, नीति विधि र प्रविधियुक्त सहकारी बनाउने संघको प्रतिवद्धता’ भन्ने नाराका साथ सम्पन्न साधारणसभामा संघको आर्थिक तथा बार्षिक प्रगती प्रतिवेदन, हाल कारोबारको अवस्था, संस्थागत कोषको अवस्था, संघको भावि कार्ययोजना लगायतको बिषयमा जिल्ला सहकारी संघका अध्यक्ष नवराज कोइरालाले जानकारी गराएका थिए । गत आर्थिक बर्षमा ८ वटा सहकारी खारेज गरिएको र २ वटा नयाँ सहकारी दर्ता भएकाले जिल्ला सहकारी संघमा अहिले २ सय ६० वटा सहकारी आवद्ध रहेको कोईरालाले उक्त अवसरमा जानकारी गराए ।
कार्यक्रममा सहकारीको क्षेत्रमा आवश्यक बजेट बिनियोजन गरे बापत मरिण गाउँपालिका, सुनकोशी गाउँपालिका, तीनपाटन गाउँपालिकालाई सम्मान गरिएको थियो । यस्तै विभिन्न क्षेत्र र विधामा जिल्ला संघमा आवद्ध सहकारीहरुलाई सम्मान गरिएको थियो । सरकारीको क्षेत्रमा बिभिन्न सहयोग पु¥याउने सहकारीहरुलाई समेत सम्मान गरिएको छ ।
संघका अध्यक्ष नवराज कोइरालाको अध्यक्षतामा सम्पन्न कार्यक्रममा राष्ट्रिय सहकारी महासंघका अध्यक्ष मिनराज कँडेल, राष्ट्रिय सहकारी महासंघका संचालक एवम् बाग्मती प्रदेश संयोजक डिबि बस्नेत, राष्ट्रिय सहकारी महासंघका लेखा सुपरिवेक्षण समितिका सदस्य बालकुमारी श्रेष्ठ, संघका सल्लाहकार विनेश कुमार श्रेष्ठ लगायतले मन्तव्य व्यक्त गरेका थिए ।
