सिन्धुली । नेकपा एमाले सिन्धुली जिल्ला अधिवेशनमा होमिएको छ । एमाले सिन्धुलीको यहि पुस २३ गते सिन्धुलीमाढीमा हुन लागेको सातौं जिल्ला अधिवेशनको तयारी तिव्र पारेको छ । जसका लागि प्रतिनिधि छनौटको काम सकिएको छ भने अन्य व्यवस्थापनका काम तिव्र रुपमा अगाडि बढाईएको छ ।
अधिवेशनको लागि प्रचार प्रसार, व्यवस्थापन, खाद्य व्यवस्थापन, आर्थिक व्यवस्थापनका काम भईरहेको नेकपा एमाले सिन्धुलीले जनाएको छ । यस्तै प्रतिनिधि व्यवस्थापनको काम समेत भईरहेको नेकपा एमालेले जनाएको छ । नेकपा एमाले सिन्धुलीको सातौं अधिवेशन प्रचार प्रसार उपसमितिका संयोजक प्रलाद पोखरेलका अनुसार अधिवेशनमा जिल्लाभरबाट ९ सय १५ जना प्रतिनिधिले भाग लिने भएका छन । जसमा नौ वटा स्थानीय तह (भुगोल)बाट ६ सय २४ जना प्रतिनिधि सहभागि हुने छन । जनवर्गिय संगठन र सल्लाहकार परिषदबाट १ सय ६९ जना, आयोजकबाट ७८ जना, एमाले जिल्ला समितिले मनोनित गर्ने ४४ जना प्रतिनिधि अधिवेशनमा सहभागि हुने छन ।
जसमा ३३ प्रतिशत महिला प्रतिनिधिको अधिवेशनमा सहभागिता हुने छ । यो एमाले अधिवेशनको इतिहासमै अत्यधिक महिला सहभागिता हो । नेकपा एमालेले विधानमै महिलाको ३३ प्रतिशत सहभागिताको सुनिश्चित गरेपछि ३३ प्रतिशत महिलाहरुले अधिवेशन प्रतिनिधि बन्न पाएका हुन ।
यस्तै एमाले जिल्ला कमिटीको १ सय ५ जनाको कमिटी समावेशी सिद्धान्तका आधारमा छनौट हुने भएको छ । उनका अनुसार महिला कम्तिमा ३५ जना निर्वाचित हुने छन । विधानमै ३३ प्रतिशत महिला अनिवार्य भएसँगै यति धेरै महिलाहरु निर्वाचित हुन थालेको पनि उनले बताए ।
जिल्ला अधिवेशनबाट अध्यक्ष १ जना, उपाध्यक्ष १ जना, सचिव १ जना र उपसचिव २ जना गरि ५ जना पदाधिकारी निर्वाचित हुने भएका छन । अधिवेशनमा निर्वाचित हुने सदस्यहरुका लागि एमालेले कलष्टर समेत छुट्याएको पोखरेलले बताए । अधिवेशनबाट एकसय जना सदस्यहरु कलष्टर अनुसार निर्वाचित हुने छन ।
कलष्टरबाट समावेशी सिद्धान्तलाई अंगिकार गर्दै एमालेले जिल्ला सदस्यहरु निर्वाचित गर्ने जनाएको छ । जस अनुसार जिल्लाका ९ वटा स्थानीय तहबाट ९ जना महिला सहित २७ जना निर्वाचित हुनेछन । दलितबाट एक महिला सहित ३ जना छानिने छन । यस्तै आदिवासी जनजातीबाट ६ जना महिला सहित १८ जना निर्वाचित हुनेछन । यस्तै खुल्लाबाट १९ जना महिला सहित ५२ जना निर्वाचित हुने भएका छन ।
जिल्ला अधिवेशनबाट पाँच पदाधिकारी सहित सदस्यहरुको आकांक्षी धेरै भएपनि सकेसम्म सर्वसम्मत तरिकाबाट नेतृत्व चयन गरिने तयारी भईरहेको पोखरेलले बताए ।
तेह्र लाख खर्च हुने अनुमान
नेकपा एमाले सिन्धुलीले महाधिवेशनमा १३ लाख खर्च लाग्ने अनुमान गरेको छ । अधिवेशन खर्च जुटाउनका लागि कुनै चन्दा भने संकलन नगरिने एमाले सिन्धुलीले जनाएको छ । खर्चको व्यवस्थापनका लागि सदस्यहरुले स्वतःस्फुर्त सहयोग गर्न भने सक्नेछन । अधिवेशनमा प्रति प्रतिनिधि १ हजार रुपैंया उठाएको एमालेले नपुग रकम व्यवस्थापनका लागि चन्दा बाहेक अन्य स्रोतको खोजी गरिने जनाएको छ । प्रतिनिधिबाट उठेको रकम बाहेक ४ लाख रुपैंया व्यवस्थापन गर्नुपर्ने भएको पोखरेलले बताए ।
