सिन्धुली । कमलामाई नगरपालिका सिन्धुलीका उपमेयर मञ्जु देवकोटाले महिलाहरुलाई सहकारीको माध्यमबाट आयआर्जनमा जोडिदै समृद्धितर्फ लाग्न आग्रह गरेकी छिन । नेकपा एमाले प्रदेश कमिटि सदस्य समेत रहेकी देवकोटाले सहकारीमा बचत गर्दै उत्पादन र आयआर्जनमा जोडिन र समृद्धि तर्फ लाग्न आग्रह गरेकी हुन ।
सहकार्य बचत तथा ऋण सहकारी संस्था सिन्धुलीको तिज विशेष शुभकामना आदान प्रदान कार्यक्रममा देवकोटाले यस्तो बताएकी हुन । देवकोटाले महिलाहरुलाई सहकारीमा महिला अधिकारका सवालमा छलफल गर्न समेत आग्रह गरेकी छिन । नेतृत्व विकास, व्यवस्थापन लगाएतका विषयमा छलफल गर्ने उपयुक्त थलोका रुपमा सहकारीलाई लिन समेत उनले आग्रह गरेकी छिन ।
कार्यक्रममा बोल्दै वचत तथा ऋण सहकारी संघ सिन्धुलीका अध्यक्ष बालकुमारी श्रेष्ठले महिलाहरुले घर देखि समाज र राज्यको काममा समेत सघाउँदै आएकाले आफुलाई कमजोर नसम्झी नेतृत्वमा लाग्न आग्रह गरिन । उनले सहकारीको सदस्य बन्नु नै स्वरोजगार बन्नु रहेको बताउँदै आर्थिकसँगै सामाजिक राजनीतिक लगाएतका क्षेत्रमा समेत महिलाहरु लाग्नुपर्नेमा जोड दिईन ।
कार्यक्रमा अनेमसंघका केन्द्रीय सचिवालय सदस्य रश्मिला देवकोटाले राज्यले सुनिश्चित गरेको समानुपातिक सहभागिता नै महिलाको कमजोर भएको बताउँदै अबको अभियान राजनीतिसँग महिला जोडिने र नेतृत्व लिनेतर्फ हुनुपर्नेमा जोड दिईन ।
अनेमसंघ कमलामाई नगर कमिटीका अध्यक्ष एवम् पत्रकार बिमला पाण्डेले पहिचान, अर्थपूर्ण सहभागिता हिंसा रहित समाज निर्माणका अभियानमा सहकारी संस्थाहरु जोडिनुपर्नेमा जोड दिईन । नेपाल सरकारको न्युनतम पारिश्रमिक निर्धारण समितिका सदस्य समेत रहेकी पाण्डेले सामाजिक राजनीतिक, आर्थिक अभियानसँगै महिला मानवअधिकारका सवालमा निरन्तर लाग्न सबै महिलाहरुलाइृ आग्रह गरेकी छिन । ‘समानता र हिंसा रहित समाज निर्माणको अभियानमा निरन्तर लागौं । सबै महिलाको अधिकारका लागि पूर्वाग्रह विना लाग्नु आवश्यक छ ।’ उनले भनेकी छिन । उनले न्युन पारिश्रमिकमा काम गर्ने महिलाहरुको सवालमा समेत आवश्यक आवाज उठाउनुपर्नेमा जोड दिईन ।
संस्थाका अध्यक्ष महेन्द्रदेव श्रेष्ठको अध्यक्षतामा भएको कार्यक्रममा जिल्ला समन्वय समितिका सदस्य गंगा कार्की, नेपाल पत्रकार महासंघ सिन्धुलीका अध्यक्ष कृष्णहरि घिमिरे, सहकारीका सल्लाहकार तथा नेपाल वार एशोसियसन जिल्ला बार ईकाई सिन्धुलीका अध्यक्ष जंग बहादुर राई लगाएतले शुभकामना मन्तव्य व्यक्त गरेका थिए । कार्यक्रममा संस्थाका सञ्चालक धनमाया राईले स्वागत गरेकी थिईन भने नियमित पर्व वचत गर्ने कनपा ७ की इन्द्र कुमारी भुजेललाई कार्यक्रममा सम्मान समेत गरिएको थियो । संस्थाले पर्व बचत गर्ने महिलाहरुका लागि हरेक वर्ष तिज विशेष शुभकामना आदान प्रदान गर्दै आएको छ ।
उक्त बचतमा १ सय ५ जना महिलाले बचत गर्दै आएका छन । सहकारीमा हाल २ हजार ४ सय सदस्य रहेका छन भने १ हजार १ सय महिला सदस्य रहेका छन । संस्थामा आठ करोड पचास लाख रकम चलाएमान रहेको सहकारीका अध्यक्ष श्रेष्ठले बताएका छन । श्रेष्ठले उद्यम गर्न वा कुनै व्यवसाय सञ्चालन गर्न चाहाने महिला सदस्यहरुका लागि २ लाख ऋण विना धितो प्रदान गर्दै आएको र धितोमा १० सम्म ऋण उपलब्ध गराउँदै आएको समेत जानकारी दिएका छन ।
