सिन्धुली । सिन्धुली अस्पतालमा निःशुल्क औषधि पाउन सकस भएको समाचार विभिन्न सञ्चार माध्यममा आएपछि सिन्धुली अस्पतालले अस्पतालमा निःशुल्क पाउने औषधिको अभाव नभएको स्पष्ट गरेको छ ।
अस्पतालका मेडिकल सुपरिटेन्डेन डा. उमेश प्रधानले विभिन्न सञ्चारमाध्यममा आएको समाचार जस्तो औषधि नपाउने अवस्था नभएको भन्दै सिन्धुली अस्पतालको ध्यानाकर्षण भएको जनाएका छन । उनले समाचारमा अभाव भनिएको सिटामोल एक वर्ष र थाईराईडको औषधि ६ महिना पुग्ने गरि मौज्दात रहेको जनाएका हुन । डा. प्रधानले थाईराइडको लिभोथेरोक्सिन नामको औषधि २५ र ५० एमजीको ६ महिनाका लागि पुग्ने मौज्दात रहेको बताए ।
सञ्चारमाध्यममा प्रकाशित समाचारप्रति अस्पताल व्यवस्थापनको ध्यानाकर्षण भएको समेत उनले जनाएका छन । उनले जीवनजल लगाएत हाल नेपाल सरकारले निःशुल्क वितरण गर्ने केहि औषधि बाहेक सबै प्रकारका औषधिहरुको मौज्दात प्रयाप्त रहेको समेत जनाएका छन ।
प्रधानले फार्मेसीले खरिद गरि सशुल्क र स्वास्थ्य विमा अन्तर्गत निःशुल्क वितरण गर्नुपर्ने औषधिको व्यवस्थापनको लागि भने शिलबन्दी दरभाउपत्र आह्वान भैसकेको र एक हप्तामा प्रक्रिया पुरा भई फार्मेसीबाट औषधि वितरण गर्ने प्रक्रियामा रहेको बताएका छन ।
अस्पतालले चिकित्सकको प्रिस्क्रिप्सन विना अस्पताल फार्मेसीबाट कुनै पनि औषधी वितरण गर्न नहुने नियम भएको हुँदा उक्त समाचार आपतिजनक भएको जनाएको छ । अस्पतालले समाचारले यस अस्पतालमा कार्यरत कर्मचारीको कार्य सम्पादनमा प्रभावित पर्न गई सेवाग्राही र सेवा प्रदायक बीचको सुमधुर सम्बन्धमा समेत खलल पुग्ने देखिएको हुँदा समाचार सम्प्रेसण गर्दा वस्तुनिष्ठ भएर समाचार गरिदिनुहुन पत्रकार, सञ्चारकर्मी, सञ्चार माध्यमलाई अनुरोध समेत गरेको छ ।
