सिन्धुली । नेकपा (प्रचण्ड माधव) पक्षका नेताहरुले ओली पक्षका नेता शान्तिमान कार्की माथि हातपात गरेका छन । विहिबार सिन्धुलीमाढी स्थित विपी राजमार्गको शान्तिनगर चोकमा सडक बन्द गराउन बसेका केन्द्रीय तथा जिल्ला नेताले कार्कीमाथि हातपात गरेका हुन ।
कार्कीलाई नेकपा (प्रचण्ड माधव) पक्षका नेता एवम् नेकपाका केन्द्रीय सदस्य कमलजंग राई, जिल्ला नेता ज्वालाप्रसाद न्यौपाने र कमलामाई नगरपालिकाका खेलकुद विकास समितिका अध्यक्ष समेत रहेका विद्यार्थी नेता दिपेन्द्र फुयाँलले हातपात गरेका हुन ।
आन्दोलन हेर्न चोकमा आएका कार्कीलाई विरामी भएर अस्पतालतर्फ जाँदै गरेको स्कुटी रोक्न खोज्दा नरोक्नुस, अस्पताल जान दिनुस भनेको निहुँमा कुटपिट गरेका हुन । कार्कीले भनेका छन, ‘खुट्टा फ्याक्चर भएको विरामी आएको स्कुटी रोकेर चावी ताने, मैले विरामीलाई जान दिन अनुरोध गरें तर मलाई नै हातपात गरियो ।’ कार्कीलाई चोटपटक लागेको छैन । धकेलिएको र मुड्किले हात तथा टाउकोमा हानेको उनले बताए ।
आन्दोलनरत समूहको तर्फबाट विघटित प्रतिनिधिसभाका सदस्य एवम् नेकपा केन्द्रीय सदस्य गणेशकुमार पहाडी, नेकपा केन्द्रीय सदस्य कमलजंग राई, बाग्मति प्रदेशसभा सदस्य लेखनाथ दाहाल (राजन), बाग्मति प्रदेशसभा सदस्य वसन्त माझीले नेतृत्व गरेका थिए ।
यसैबीच नेकपा (ओली पक्ष) का नेता कार्कीमाथि भएको हातपातको विरोधमा ओली पक्षका कार्यकर्ताले नारावाजी समेत गरेका थिए । उनीहरुले दोषीमाथि कारवाहि गर्नुपर्ने, बन्द खुला गर्नुपर्ने लगाएतका माग राखेका थिए ।
कुनै आपतकालिन सवारी साधनमा रोक नलगाईएको आन्दोलनका अगुवा नेता गणेशकुमार पहाडीले दावी गरेका छन । बाटोमा कुनै व्यक्ति नरोकिएको उनले बताए ।
दुवै पक्षको विवाद बढ्न थालेपछि स्थानीय प्रशासनले त्यसलाई न्युन गर्ने प्रयास गरेको छ । जसको फलस्वरुप ओली पक्षका नेता प्रदीप कटुवालले आफ्ना कार्यकर्तालाई सडकबाट जिल्ला प्रशासन कार्यालय तर्फ लगेका थिए । उनले झडपको स्थितिलाई न्युन गर्न कार्यकर्तालाई आन्दोलन स्थलबाट हटाउँदै प्रमुख जिल्ला अधिकारीसमक्ष लगेका थिए ।
नेता कार्कीलाई हातपात गर्ने नेकपा (प्रचण्ड माधव) पक्षका नेता विरुद्ध जिल्ला प्रहरी कार्यालयमा मुद्दा दिईएको नेकपा (ओली) पक्षका नेता प्रदीप कटुवालले बताए । उता जिल्ला प्रहरी कार्यालयका एसपी आभुषण तिम्सिनाले भने आफुहरुकोमा उजुरी नआएको बताए ।
