सिन्धुली । कमलामाई नगरपालिकाका उपप्रमुख मञ्जु देवकोटाले लैंगिक हिंसा अन्त्यका लागि महिला पुरुषको सहकार्य आवश्यक रहेको बताएकी छिन । उनले व्यक्तिमा सकारात्मक सोंचको विकास गर्दै महिला पुरुषको सहकार्य गराउनु आजको आवश्यकता रहेको बताएकी हुन ।
लैंगिक हिंसा विरुद्धको १६ दिने अभियानका क्रममा कमलामाई नगरपालिकाले वडा स्तरमा आयोजना गरेको लैंगिक हिंसा न्युनिकरणमा महिला पुरुष सहकार्य कार्यक्रमलाई सम्बोधन गर्दै उनले यस्तो बताएकी हुन ।
उनले कमलामाई नगरपालिकाको वडा नं. ११ र वडा नं. १२ मा आयोजित दुवै कार्यक्रमलाई सम्बोधन गरेकी छिन । उनले लैंगिक हिंसा अन्त्यका लागि स्थानीय स्तरमा लैंगिक हिंसाका घटना हुन नदिन स्थानीय नागरिकमा सचेतना आवश्यक रहेकाले कार्यक्रम अभियानका रुपमा १४ वटै वडामा लगिएको बताएकी छिन ।
कार्यक्रममा बोल्दै नगरपालिकाका प्रमुख प्रशासकीय अधिकृत विशकसेन ढकालले लैंगिक हिंसा अन्त्य र पीडितको संरक्षण र संवद्र्धनमा नगरपालिकाले उल्लेख्य काम गरिरहेको बताए । उनले सचेनाका कार्यक्रमले लैंगिक हिंसा न्युनिकरणमा महत्वपूर्ण भूमिका खेल्ने बताए ।
कार्यक्रममा बोल्दै नेपाल पत्रकार महासंघ सिन्धुलीका उपाध्यक्ष बिमला पाण्डेले लैंगिक हिंसा अन्त्यका लागि स्थानीय नागरिकको भूमिका महत्वपूर्ण हुने बताईन । उनले स्थानीय सरकारले पीडितको संरक्षण, उद्धार र आयआर्जनका लागि उल्लेख्य काम गर्नुपर्ने बताएकी छिन । उनले स्थानीय पाठ्यक्रममा समेत लैंगिक हिंसा र त्यससँग सम्बन्धित कानुनका विषयलाई समेट्नुपर्ने बताएकी छिन । उनले हिंसा न्युनीकरणका लागि स्थानीय समुदाय, समूह, बाल क्लब, आमा समूहहरु, सहकारीहरुको उल्लेख्य भूमिका रहेको बताईन ।
दुवै वडाका कार्यक्रममा लैंगिक हिंसाका सवालमा नगरपालिकाका सामाजिक शाखा प्रमुख सत्यदेवी अधिकारी र कानुनी प्रावधानका विषयमा नगरपालिकाका कानुनी अधिकृत अधिवक्ता टंकविक्रम थापाले सहजीकरण गरेका थिए ।
कार्यक्रममा जिल्ला समन्वय समिति सिन्धुलीका सदस्य गंगा कार्की, सम्बन्धित वडाका जनप्रतिनिधिहरु, कर्मचारीहरु लगाएतको सहभागिता रहेको थियो ।
