सिन्धुली । कमलामाई नगरपालिकाका मेयर खड्ग खत्रीले नगरपालिकाबाट सञ्चालनमा रहेका योजनाको अनुगमन गरेको छ । अनुगमनका क्रममा कमलामाई नगरपालिकाका मेयर खड्ग खत्रीले स्टमेट अनुसारको काम नभएका स्थानमा पुगी निर्माणाधिन योजनाको ढलाल भत्काएका छन । मेयर खत्रीले कमलामाई माईस्थान तिनतले पाथिपरान सडकको ढलान भत्काएका हुन ।
ढुंगाले हानेर ढलान भत्काई स्टमेट अनुसार निर्माण सामग्रीको मात्रा समेत मिलाउन कामदारलाई सिकाएका थिए । उनले आफै सिमेन्ट बालुवा समेत मुछेर कामदारलाई सिकाएका थिए ।
अनुगमन समितिका संयोजक तथा नगर उपप्रमुख मञ्जु देवकोटा, प्रमुख प्रशासकीय अधिकृत विशकसेन ढकाल, लेखा अधिकृत टेकेन्द्र कार्की, योजना शाखा प्रमुख इन्जिनियर विनोदबाबु खकुराल, वातावरण शाखा प्रमुख सागर कुमार ढकाल, साईड इन्जिनियरहरु लगाएतको टोलीले ६ वटा योजनाको अनुगमन गरेको थियो ।
अनुगमनका क्रममा कामको गुणस्तर नभएको स्थानमा मेयर खत्री आफैले काम भत्काई फेरी स्टमेट अनुसार गर्न निर्देशन दिएका थिए । उनले काम गर्न नगरपालिकाले बजेट दिने तर त्यसको सदुपयोग हुनुपर्ने बताएका थिए ।
उक्त सडकको ग्रेडिङ वाल र होम पाईप ढलानमा काममा कम गुणस्तर भेटिएकाले अन्तिम भुक्तानी लिनु पूर्व काम पुरा गर्न ठेकेदार कम्पनीलाई निर्देशन दिईएको मेयर खत्रीले बताएका छन । उनले काम गुणस्तर र समयमा गर्न समेत अनुरोध गरेका थिए । उक्त सडकको काम गौरीमाई कन्ट्रक्सन काठमान्डौले निर्माणको जिम्मा पाएको थियो । ९७ लाख रुपैंया बजेटमा बन्दै गरेको उक्त सडकको काम पुरा भएको भनि कम्पनीले अन्तिम किस्ता भुक्तानी माग गरेको थियो ।
अन्तिम किस्ता भुक्तानीका लागि गरिएको अनुगमनमा होम पाईपको मुख प्लाष्टर नभएको, कल्भर्टको प्वाईन्टिङ गर्न बाँकी रहेको र हेडवालमा प्लाष्टर सेट नभएको पाईएको योजना शाखाका प्रमुख इन्जिनियर विनोदबाबु खकुरालले बताए ।
उनका अनुसार नगरपालिकाले अनुगमन टोलीले देखाएका कमजोरी सुधार गरि काम पुरा गरेपछि अन्तिम किस्ता भुक्तानी गर्ने भएको छ । निर्माण कम्पनिलाई ३० लाख भुक्तानी दिन बाँकी रहेको पनि नगरपालिकाले जनाएको छ ।
यसैबीच उक्त टोलीले निर्माणाधिन रहेको माइस्थान पिकनिक स्पोर्ट, चँदाहा पिकनिक स्पोर्ट, तिनतले आधारभूत स्वास्थ्य केन्द्रको भवन, डाँडाटोल दोभानटार सडक र काउछे भंगेरे टोल सडक कालोपत्रे लगाएतका योजना अनुगमन गरेको छ ।
