सिन्धुली । प्रहरी सेवालाई चुस्त दुरुस्त बनाउन जिल्लाका २ नगरपालिकामा उजुरी पेटिका राखिएको छ । जिल्ला प्रहरी कार्यालय सिन्धुली र स्थानीय तहको समन्वयमा कमलामाई नगरपालिका र दुधौली नगरपालिकामा उजुरी पेटिका राखिएको हो ।
बाग्मति प्रदेश प्रहरीको प्रहरी कर्मचारीको कार्यसम्पादन सम्बन्धि गुनासो तथा सुझाव संकलन पेटिका सञ्चालन तथा व्यवस्थापन योजना २०७७ बमोजिम बाग्मति प्रदेशका महा नगरपालिका, उप महानगरपालिका तथा नगरपालिकामा उजुरी पेटिका राख्ने कार्यक्रम अन्तर्गत उजुरी पेटिका राखिएको हो ।
सर्वसाधारण नागरिकको सहजताका लागि उक्त उजुरी पेटिका राखिएको र हरेक महिनाको एक गते सम्बन्धित नगरपालिकाको रोहबरमा उजुरी संकलन गरि प्रदेश कार्यालयमा पठाईने र गुनासोको सम्बोधन गरि प्रहरी सेवामा सुधार गर्ने गरि उजुरी पेटिका राखिएको जिल्ला प्रहरी कार्यालय सिन्धुलीका एसपी रञ्जु सिग्देलले बताईन ।
उनका अनुसार प्रहरीको काम कारवाहि तथा गुनासो संकलनका लागि सबै स्थानीय तहमा उजुरी पेटिका तत्काल राखिने छ । पहिलो चरणमा नगरपालिका, त्यसपछि गाउँपालिका र वडा तहसम्म उजुरी पेटिका राखिने सिग्देलले बताईन ।
कमलामाई नगरपालिकामा मेयर खड्ग खत्रीले उजुरी पेटिकाको उद्घाटन गरेका छन भने दुधौली नगरपालिकामा डिएसपी श्याम बहादुर खत्रीको उपस्थितिमा नगरपालिकाका मेयर घनश्याम राउतले उजुरी पेटिका उद्घाटन गरेका छन ।
उजुरी पेटिका उद्घाटन गर्दै कमलामाई नगरपालिकाका मेयर खड्ग खत्रीले उजुरी पेटिका व्यवस्थापनले प्रहरीको काम कारवाहिका चुस्त दुरुस्तता, पारदर्शिता ल्याउने विश्वास व्यक्त गरे । उनले सबै वडाहरुमा उजुरी पेटिकाको बारेमा जानकारी गराउन सूचना प्रवाह गर्ने पनि बताए ।
