सिन्धुली । सिन्धुली अस्पतालको इमर्जेन्सीमा उपचारका क्रममा विहिबार मृत्यु भएकी महिलाको कोभिड १९ रिपोर्ट नेगेटिभ आएको छ । महोत्तरीको बर्दिवास नगरपालिका वडा नं. ३ पाटुकी २१ वर्षकी महिलाको उपचारका क्रममा विहिबार मृत्यु भएको थियो ।
महिलामा ज्वरोे अत्यधिक भएकाले कोरोना परिक्षणका लागि स्वाव संकलन गरि अस्पतालले शुक्रबार परिक्षणका लागि केन्द्रीय प्रयोगशाला टेकुमा पठाईएको थियो । उनको रिपोर्ट नेगेटिभ आएको सिन्धुली अस्पतालका कोभिड १९ फोकल पर्सन डा. प्रसन्न राजभण्डारीले बताए ।
अत्यधिक ज्वरो र श्वासप्रश्वासमा समस्या आएपछि अस्पतालमा उपचारका लागि ल्याईएकी महिलाको उपचारका क्रममा मृत्यु थियो । रगतमा इन्फेक्सन देखिएको, फोक्सोमा पानी जमेको, मृगौला कमजोर देखिएका कारण उनको मृत्यु भएको अस्पतालले जनाएको थियो ।
तीनचार दिनदेखि ज्वरो आएको र महिलालाई ढिलो गरि भर्ना गर्न ल्याईएको कारण समयमा उपचार हुन नसक्दा उनको मृत्यु भएको अस्पतालले जनाएको छ । महिलाको शव शुक्रबार नै परिवारको जिम्मा लगाईएको थियो ।
