सिन्धुली । सुनकोशी गाउँपालिकाले स्थानीय पाठ्यक्रम बनाउने भएको छ । गाउँपालिकाले पाठ्यक्रम निर्माणको पूर्व तयारी स्वरुप कार्यदलको समेत निर्माण गरेको छ । रामचन्द्र आचार्यको संयोजकत्वमा कार्यदल निर्माण गरिएको सुनकोशी गाउँपालिकाका शाखा अधिकृत ओम प्रसाद गौतमले जनाएका छन ।
उनले जनाए अनुसार आचार्यको संयोजकत्वमा ११ सदस्यीय कार्यदल बनाइएको हो । कार्यदलका सदस्यमा शंकर उप्रेती, विनोद कोईराला, रिता देवकोटा, विमल पौडेल तुलसी प्याकुरेल, विनोद न्यौपाने, नेत्र बहादुर सुनुवार, शेर बहादुर लामा, खेल बहादुर पुलामी रहेका छन भने सदस्य सचिवमा शिक्षा शाखा अधिकृत ओम प्रसाद गौतम रहेका छन ।
बुधबार गाउँ शिक्षा समितिले गरेको निर्णय सार्वजनिक गर्दै शाखा अधिकृत गौतमले उक्त जानकारी दिएका हुन ।
यस्तै गाउँपालिकाले वैकल्पिक प्रणालीबाट विद्यार्थीहरुको सिकाईमा सहजीकरण गर्ने भएको छ । जसका लागि वडा शिक्षा समितिहरुको सहयोगमा स्थानीय शिक्षकहरु, अविभावकहरु, रेडियो टेलिभिजनको प्रयोग गर्ने भएको छ ।
यस्तै गाउँपालिकाले विभिन्न विद्यालयलाई आठ ल्यापटप, आठ वटा प्रोजेक्टर र ११ वटा प्रिन्टर प्रदान गर्ने निर्णय गरेको छ । गाउँपालिकाले सात विद्यालयको कक्षा अपग्रेड गर्ने निर्णय समेत गरेको छ ।
गाउँपालिकाको जेठ २२ गते बसेको बैठकले सो निर्णय गरेको हो । शिक्षा शाखाले बुधबार जारी गरेको विज्ञप्ति अनुसार गाउँ शिक्षा समितिको बैठकले ओद्रेकोटस्थित पञ्चकन्या स्कुल र प्रगती इङ्लिस स्कुललाई कक्षा १० सम्मको अनुमति दिएको छ ।
पशुपति आवासिय विद्यालय र श्री आवासिय विद्यालय घ्याम्पाटारलाई कक्षा ८ सञ्चालनको अनुमति दिएको छ भने आदिलिङ्ग कुशेश्वर गुरुकुलम र फाइभ स्टार बोर्डिङलाई कक्षा सात र प्राथमिक विद्यालय खानीगाउँलाई कक्षा छ सम्म अध्यापनको अनुमति दिइएको छ ।
