सिन्धुली । लैगिक हिंसा विरुद्धको १६ दिने अभियान सिन्धुलीमा विभिन्न कार्यक्रम गरि मनाईएको छ । मूल आयोजक समिति कमलामाई नगरपालिकाको आयोजनामा सोमबार दिउँसो सिन्धुलीमाढीमा ¥याली तथा कोणसभाको आयोजना गरियो भने साँझ लोकतान्त्रिक चोकमा दिप प्रज्वलन गरिएको छ । 
समितिले कमलामाई नगरपालिका र नगरमा क्रियाशिल संघसंस्था तथा नागरिक समाज, विभिन्न सञ्जाहलरु लगाएतको सहकार्यमा १६ दिनसम्म १४ वटै वडामा कार्यक्रम लाने गरि सोमबार सार्वजनिक समेत गरिएको छ । मूल आयोजक समितिका संयोजक एवम् कमलामाई नगरपालिका सिन्धुलीका उपप्रमुख मञ्जु देवकोटाले कोणसभालाई सम्बोधन गर्दै कार्यक्रम समेत सार्वजनिक गरेकी थिइन ।
समानताको पुस्ताः बलात्कार विरुद्धको ऐक्यवद्धता भन्ने मूल नाराका साथ कमलामाई नगरपालिका कार्यालय अगाडिबाट सुरु भएको ¥यालीले माढीबजार परिक्रमा गरि खुलामञ्चमा पुगि कोणसभामा परिणत भएको थियो । ¥यालीमा विभिन्न संघसंस्था, प्रहरी प्रशासन, नागरिक समाज, सहकारी संस्थाहरु, शैक्षिक संस्थाहरु, अधिकारकर्मीहरु, पत्रकारहरु लगाएतको सहभागिता रहेको थियो ।
¥यालीमा सहभागिहरुले घरेलु श्रमको सम्मान गरौ, लैंगिक हिंसा अन्त्यको लागि सबै जुटौं, कोहि नछुटौं, लैंगिक हिंसाको मूल आधारः संरचनागत विभेदको अन्त्य लगाएतका नारासहितका सन्देशमूलक सूचनाहरु टाँस गरेका थिए ।
अभियानका क्रममा विवाहवारी २० वर्ष पारी भन्ने फोटो फ्रेममा सहभागिले फोटो सेसन समेत गरेका थिए । ओरेक नेपालले तयार गरेको उक्त फ्रेममा म उमेर पुगेपछि मात्र विवाह गर्छु, मलाई स्वस्थ भई जीवन जीउनु छ, म शिक्षित बन्नु छ, मलाई आफ्नो पहिचान बनाउनु छ, मलाई आत्मनिर्भर भई स्वतन्त्रतापूर्वक जीवन जिउनु छ लगाएतका शन्देश सहितको फ्रेममा धेरै सहभागिहरुले फोटो खिचेका थिए ।
यसैबीच कमलामाई नगरपालिकाको आयोजनामा साँझ लोकतान्त्रिक चोकमा दिप प्रज्वलन गरिएको छ । लैगिक हिंसा विरुद्धको दिवसलाई सुखद र महिलाहरुको अधिकार प्राप्तीको दिनको सम्झना स्वरुप दिप प्रज्वलन गरिएको हो ।
नोभेम्बर २५, देखि डिसेम्बर १० तारिख सम्म १६ दिनलाई महिला हिंसा विरुद्धको १६ दिने अन्तराष्ट्रिय अभियान अन्तर्गत विश्वभर मनाउदै आएको २८ बर्ष भईसकेको छ । महिलामाथि हुने हिंसा मानवअधिकार हनन्को सवाल हो भन्ने मान्यतालाई स्थापित गर्दै सोहि अनुरुपकार्य गर्न देश तथा संयुक्त राष्ट्र संघीय निकायहरुलाई आह्वान गर्ने उद्देश्यले यो अभियान अन्तर्गत २५ नोभेम्बर–महिला हिंसा विरुद्धको दिवस देखि १० डिसेम्बर–मानवअधिकार दिवससम्म समुदायदेखि सबै तहसम्म विभिन्न अभियान मुलक कार्यक्रमहरु गर्ने गरिन्छ । यहि अनुसार सिन्धुलीमा पनि विभिन्न कार्यक्रमको तय गरिएको हो ।
यसको सन्दर्भ डोमिनिकन गणतन्त्रका मिरावेल परिवारका तीन दिदीबहिनीहरूको तत्कालिन त्रुजिलो तानाशाही सरकारले सन् १९६० मा गरेको निर्मम हत्यासँग जोडिएको छ । यस घटनालाई लिङ्गको आधारमा हुने राजनीतिक हिंसाको प्रतिरूप मानिन्छ । यसै प्रतिरूप पेट्रिया, मिनर्भा र मारिया नाम गरेका तीन दिदीबहिनीको हत्यालाई महिला विरुद्धको हिंसाको रूपमा लिई महिलावादीहरूद्वारा उनीहरूको सम्झनामा विभिन्न कार्यक्रम आयोजना गर्दै मनाउने परम्पराको सुरुवात गरीएको हो । पछि संयुक्त राष्ट्रसंघद्वारा यसलाई आत्मसात गरी संसारभर नै यो दिवसलाई महिला हिंसा विरुद्धको दिवसको रूपमा स्थापित गरिएको हो ।
