सिन्धुली/सहकार्य बचत तथा ऋण सहकारी संस्था लिमिटेड कमलामाई नगरपालिका– ६ सिन्धुलीको एक वर्षको मुनाफा ७३ लाख ५५ हजार रहेको सहकारीका अध्यक्ष महेन्द्रदेव श्रेष्ठले बताएका छन । सोमबार सिन्धुलीको ढुंग्रेवासमा सम्पन्न सहकारीको छैठौँ वार्षिक साधारणसभामा उनले उक्त कुरा जानकारी दिएका हुन ।
सहकारीले आर्थिक वर्ष २०७४÷०७५ मा ७३ लाख ५५ हजार मुनाफा कमाउन समेत सफल भएको उनले बताए ।
अध्यक्ष श्रेष्ठको अध्यक्षता तथा प्रदेश सांसद विनोद खड्काको प्रमुख आतिथ्यतामा भएको कार्यक्रममा संस्थामा हाल २ करोड ११ लाख रुपैया शेयर पूँजी रहेको र ४ करोड १५ लाख ३० हजार चुक्ता पूँजी रहेको प्रतिवेदन सार्वजनिक गरिएको छ । कार्यक्रममा गत आर्थिक वर्ष २०७४÷०७५ मा ४ करोड २८ लाख ९ हजार ९ सय ९३ रुपैँयाको कारोबार भएको समेत जानकारी गराइएको थियो ।
कार्यक्रममा शेयर सदस्य तथा नेकपाकी केन्द्रिय सदस्य उमा कोईराला, रमेश कार्की, राष्ट्रिय सहकारी बैकका प्रवन्धक श्रवण नेवा खड्गी, साहित्यकार केशव फुयाल, नेकपाकी नेतृ शान्ता पाख्रिन, समाजसेवी भिष्मराज श्रेष्ठ, विनोद श्रेष्ठ लगायतको उपस्थिति रहेको थियो ।
कार्यक्रममा उत्कृष्ट वचतकर्ता तथा उत्कृष्ट ऋणीहरुलाई सम्मान समेत गरिएको छ । सम्मानित हुनेहरुमा पिपलकुमार श्रेष्ठ, सुजिता लामा, वसन्ती बम्जन, गणेश थापा र उत्कृष्ट कर्मचारीमा कमला कुमारी सुुनुवार रहेका छन । सहकारीले शेयर सदस्यहरुलाई विना धितो ५० हजारसम्म र धितोमा व्यवसाय र उद्देश्यका आधारमा १० लाख रुपैयासम्म लगानी गर्दै आएको अध्यक्ष श्रेष्ठले बताए ।
