सिन्धुली/ जिल्लामा रहेका ६ वटा सरकारी कार्यालयहरु संघिय संरचनाका नाममा अन्य जिल्लामा स्थानान्तरण हुने भएपछि सिन्धुलीका नागरिक समाज आन्दोलित भएका छन । आन्दोलनका क्रममा विहिबार शहरी विकास तथा भवन डिभिजन कार्यालयमा एक घन्टा धर्ना दिएका छन भने प्रमुख जिल्ला अधिकारी मार्फत प्रधानमन्त्री तथा ३ नं. प्रदेशका मुख्यमन्त्रीलाई ज्ञापन पत्र समेत बुझाएका छन ।
धर्ना कार्यक्रम लगतै जिल्ला प्रशासन कार्यालय मार्फत प्रधानमन्त्री तथा मन्त्रीपरिषदको कार्यालय र ३ नं. प्रदेशका मुख्य मन्त्री तथा मन्त्रीषरिषदको कार्यालयलाई ज्ञापनपत्र बुझाएको आम नागरिक समाजका अगुवा एवम् संघर्ष समितिका संयोजक प्रलादकुमार पोखरेलले बताए ।
सिन्धुली जिल्लामा विगत लामो समयदेखि रहेका सिंचाई डिभिजन कार्यालय, खानेपानी तथा सरसफाई डिभिजन कार्यालय, शहरी विकास तथा भवन डिभिजन कार्यालय, भू–संरक्षण कार्यालय, जिल्ला जनस्वास्थ्य कार्यालय र प्राविधिक कार्यालय जिल्लाबाट अन्यत्र स्थान्तरण हुन लागेको भन्दै ती कार्यालयलाई जिल्लामै रहन दिन नागरिक अगुवाहरुले माग गरेका छन ।
शहरी विकास तथा भवन डिभिजन कार्यालयको गेटमा एक घण्टा धर्ना बसेका नागरिक समाजका व्यक्तिहरु ¥याली सहित जिल्ला प्रशासन कार्यालयमा पुगि प्रमुख जिल्ला अधिकारी ज्ञानप्रसाद ढकाललाई ज्ञापन पत्र बुझाएका हुन । नागरिक आन्दोलनका संयोजक प्रलाद पोखरेलले ज्ञापन पत्र बुझाई सम्बिन्धित निकायमा पुराईदिन आग्रह गरे ।
ज्ञापन पत्र बुझ्दै प्रमुख जिल्ला अधिकारी ढकालले ज्ञापनपत्र प्रधानमन्त्रीको कार्यालय एवम् मुख्य मन्त्रीको कार्यालयमा तत्काल पठाउने प्रतिवद्धता समेत व्यक्त गरेका छन ।
संयोजक प्रल्हादकुमार पोख्रेल, नेपाली कांग्रेसका जिल्ला सचिव दिपककुमार घिमिरे, नेता मार्णिक ढकाल, तरुण दल अध्यक्ष बिजय कुबँर, नेपाल पत्रकार महासंघका केन्द्रीय सदस्य द्धारिका काफ्ले, नेपाल कम्युनिष्ट पार्टीका हरि अधिकारी, कनपा ५ का वडा अध्यक्ष पूर्ण बहादुर खड्का, वडा सदस्य तुलसि प्रसाद गौतम, पत्रकार अनिल भण्डारी, नागरिक समाज सिन्धुलीका यमराज श्रेष्ठ, निर्मल थापा, उद्योग बाणिजय संघका बरिष्ठ उपाध्यक्ष अर्जुनकुमार श्रेष्ठ र कनपा ५ का सचिव उज्वल विक्रम थापाले ज्ञापन पत्रमा हस्ताक्षर गरेका छन ।
के के छन आन्दोलनका कार्यक्रम ?
सिन्धुलीका आम नागरिक समाजको नाममा भएको आन्दोलन अब चरणवद्ध रहने आयोजकले जनाएको छ । संघिय सरकारले संघियताको मर्म विपरित सिन्धुलीबासीको घरदैलोको सुविधा खोस्न थालेको उनीहरुको निश्कर्ष छ । सोहि अनुसार समितिको बैठकले लगातारका आन्दोलनका कार्यक्रम तय गरि सार्वजनिक गरेको छ ।
घोषित कार्यक्रम अनुसार असोज १२ गते जिल्ला खानेपानी तथा सरसफाई डिभिजन कार्यालयमा ११ बजेदेखि साढे एघारबजेसम्म आधा घण्टा धर्ना र १२ बजेदेखि आधा घण्टा विपी राजमार्गमा धर्ना बसी अवरोध गर्ने, असोज १४ गते सिंचाई डिभिजन कार्यालय र भू संरक्ष्गण कार्यालयमा ११ बजेदेखि १२ बजेसम्म धर्ना र १२ बजेदेखि १ बजेसम्म विपी राजमार्ग चक्काजाम गर्ने कार्यक्रम रहेको छ ।
यस्तै असोज १५ गते जिल्ला जनस्वास्थ्य कार्यालय र प्राविधिक कार्यालय सिन्धुलीमा ११ बजेदेखि एकघण्टा धर्ना र १२ बजेदेखि विपी राजमार्ग एकघण्टा चक्काजाम गर्ने, असोज १६ गते जिल्लाबाट स्थानान्तरण हुने कार्यालयहरुमा प्रदेश मातहत रहि जिल्लामै स्थापना भएको वोर्ड राखिने कार्यक्रम तय भएको छ ।
