सिन्धुली । कमलामाई नगरपालिका वडा नं. ५ मा रहेको सिलामे स्वास्थ्य चौकीमा विरामीको संख्या समेत उल्लेख्य रहेको तर स्वास्थ्य चौकीलाई आवश्यक कोठाहरुको अभाव रहेको स्थानीयले बताएका छन ।
युवा नागरिक अंकपत्र कार्यान्वयनका शिलशिलामा सहभागी महिला तथा स्वास्थ्यकर्मीले महिला विरामी जाँचका लागि गोप्य कोठाको अभाव भएकोले व्यक्तिगत गोपनियता कायम गर्न समेत कठिनाइ भएको, अलग्गै परामर्श कक्ष नहुँदा स्वास्थ्य संस्थाले दिनुपर्ने परामर्श सेवा प्रभावित भएको विषय उठान गरेका छन ।
भवनमा कोठाको अभाव भए पनि स्वास्थ्य चौकीले सेवा प्रदान गरिरहेको उनीहरुले बताए । उनीहरुले फिजिसियन डाक्टरको आवश्यकता रहेको समेत सवाल उठाए ।
स्वास्थ्य चौकीबाट बेला बेलामा कोठाहरु थप गर्नुपर्ने कुरा त आउने गरेको भए पनि सरोकारवालाको ध्यान पुग्न सकेको छैन ।
निःशुल्क आधारभूत स्वास्थ्य प्राप्त गर्ने व्यक्तिको संवैधानिक हक प्राप्त गर्नबाट नागरिक वञ्चित भइरहेको स्थानीयको गुनासो रहेको छ ।
कार्यक्रम नागरिकको गुनासो आएपछि कार्यक्रममा गएका वडा अध्यक्ष पूर्ण बहादुर खड्काले स्वास्थ्यचौकीको भवनको तला थप्न पहल गर्ने आश्वासन दिएका छन ।
उनले स्वास्थ्य चौकीमा कोठा थप गरी परामर्श सेवा, विरामी जाँच सेवा, औषधी भण्डारण कक्षलाई व्यवस्थित बनाउन प्रयास गर्ने बताए । ‘नगरपालिका, जिल्ला, प्रदेश जहाँ पुगेर पैरवी गर्नुपरे पनि म तयार छु,’ खड्काले भने ।
उठान गरिएकामध्ये कतिपय सवालहरु सम्बोधन भइरहेको उनले बताए । यस्तै कार्यक्रममा कमलामाई नगरपालिका वडा नं. ५ मा रहेको कमला जनज्योति माध्यमिक विद्यालय सिलामेमा सेनिटरी प्याड विसर्जन स्थल आवश्यक भएको सवाल समेत उठान भएको छ ।
सुरक्षित विसर्जन स्थल नहुँदा विद्यालयको सरसफाईका साथै छात्राहरुको महिनावारी स्वच्छता व्यवस्थापनमा वाधा पुगेपछि पश्चात् ह्याण्ड्स नेपालकै सहयोगमा गल्र्स स्ट््याण्डिङ स्ट्रङ परियोजनाबाट सेनिटरी प्याड सुरक्षित विसर्जनस्थल निर्माण भएको जनाइएको छ ।
यसैगरी, कमलामाई नगरपालिका, वडा नं. १४ मा रहेको जनता माध्यमिक विद्यालयमा नगरपालिकाको सहयोगमा सेनिटरी प्याड जलाउने मेसिन खरिद गरी प्रयोगमा आइरहेको छ ।
दीर्घकालीन प्रकृतिका सवालहरु वडा तथा नगरपालिकाको वार्षिक कार्यक्रममा समावेश गर्ने प्रयास भइरहेको नगरपालिकाले जनाएको छ ।
