सिन्धुली । नेपालको संविधान र कानुनले महिलालाई अधिकार सम्पन्न बनाएको भए पनि कानुन कार्यान्वयन उपलब्धि मूलक बन्न नसकेको सिन्धुलीका अधिकारकर्मी तथा महिला नेतृत्वले बताएका छन ।
संविधान दिवस २०७७ का अवसरमा शनिबार सिन्धुलीमाढीमा आयोजित सम्वाद कार्यक्रममा महिलाको सहभागिताको सम्वन्धमा भएको छलफलमा जिल्लाका अग्रणी महिलाहरुले यस्तो बताएका हुन ।
उनीहरुले राज्यले समानुपातिक सहभागिता र समानताको हकलाई सुनिश्चत गरेको भए पनि त्यो अधिकार व्यवहारमा प्रयोग गर्न खोज्दा चुनौती सृजना भएको बताए ।
जिल्लाका राजनीतिक दल सम्बद्ध महिला नेता तथा जनप्रतिनिधि महिलाहरुले महिलाको अधिकार कुण्ठित गर्न पुरुष नेतृत्व लागि परेको, महिला नेतृहरुबीच महिलाका मुद्दामा एकता हुन नसकेको, अधिकार पाएका वा निर्वाचित जनप्रतिनिधिहरुले पनि आफ्ना अधिकार निर्वाध प्रयोग गर्न नपाएको, अधिकार लिन खोज्दा अपमानित हुनु परेको लगाएतका सवाल उठान गरेका थिए ।
यस्तै सामाजिक क्षेत्रका अगुवा महिलाले महिलाको अर्थपूर्ण सहभागिता हुन नसकेको, महिला हिंसा जस्ता सवालमा एकता हुन नसकेको बताए । उनीहरुले महिलाको न्यायीक पहुँच घट्दै गएको र लैंगिक सवालमा राजनीतिक हस्तक्षेप बढेकाले साझा सवालमा साझा धारणा र कार्ययोजना बनाएर महिला आन्दोलन अगाडि बढाउनुपर्ने बताए ।
कार्यक्रममा बोल्ने अधिकांश महिलाहरुले महिला सहभागिता अर्थपूर्ण बनाउन नसकिएमा महिलाको सहभागिता र मुद्दा ओझेलमा पर्ने बताएका थिए । उनीहरुले संबैधानिक अधिकारलाई सुनिश्चित गर्न महिला एकता अपरिहार्य रहेकाले कार्ययोजना बनाई अगाडि बढ्नुपर्ने बताए ।
कार्यक्रममा नेकपाका केन्द्रीय सदस्य उमा कोइराला, नेकपा नेतृ शान्ता पाख्रिन, रश्मिला देवकोटा, अन्तर्पापार्टी महिला सञ्जालका अध्यक्ष सविता कोइराला, नेपाली कांग्रेसका नेतृहरु शान्ता कार्की, यशोदा कोइराला, जिल्ला समन्वय समितिका उपप्रमुख सम्झना अधिकारी, कमलामाई नगरपालिकाका उपमेयर मञ्जु देवकोटा, गोलञ्जोर गाउँपालिकाका उपाध्यक्ष गंगादेवी श्रेष्ठ, घ्याङ्लेख गाउँपालिकाका उपाध्यक्ष दुर्गा सुनुवार, कमलामाई नगरपालिकाका सामाजिक विकास शाखा प्रमुख सत्यदेवी अधिकारी, सामाजिक अभियन्ताहरु पार्वती भट्टराई, अप्सरा खड्का, मनिषा पोखरेल अधिवक्ता शुशिला थिङ लगाएतका महिलाहरुले महिला सहभागिताको हालको अवस्थाको बारेमा छलफल गरेका थिए ।
कार्यक्रममा महिला पत्रकारहरु, महिला अधिकारकर्मीहरु, कर्मचारी महिलाहरु, शिक्षक महिलाहरु लगाएतका अग्रणी महिलाहरुको सहभागिता रहेको थियो । कार्यक्रमको सहजीकरण सुष्पा भुजेलले गरेकी थिइन भने विषयवस्तुबारे जानकारी सम्वाद समूहका विराज शर्माले गराएका थिए ।
