सिन्धुली । जिल्लामा उन्नाईस सय बढी मतदाता थपिएका छन् । जिल्ला निर्वाचन कार्यालय सिन्धुलीका अनुसार मंसिर १ गतेसम्म १ हजार ९ सय ५ जना मतदाता थपिएका हुन् । फागुन २१ गते निर्वाचन गर्ने सरकारको निर्णयसँगै मतदाता नामावलीमा नाम दर्ता गर्नेहरु बढेका हुन् ।
मतदाता नामावलीमा नाम दर्ता सुरु भएसँगै जिल्लामा त्रुटि सच्चाउने, मतदाता नामावली अध्यावधिक गर्ने र नयाँ नाम दर्ता गर्ने काम भईरहेको छ । जसमा जिल्लामा ८ सय ७ जना महिला र एक हजार ९८ जना पुरुषले नाम दर्ता गरेका छन् । यो तथ्यांक मंसिर १ गतेसम्मको हो ।
तथ्यांक अनुसार असोज महिनामा ४ सय २ जना, कार्तिक महिनामा १ हजार ४ सय १८ जना र मंसिर १ गते ८५ जनाले मतदाता नामावलीमा नाम दर्ता गराएका छन् ।
यस्तै जिल्लामा ३२ जनाले त्रुटि सच्चाएका छन् भने ६२ जनाले मतदाता नामावली सच्चाएको जिल्ला निर्वाचन कार्यालय सिन्धुलीका सूचना अधिकारी अस्मिता लुंगेलीले बताएकी छिन् ।
जसमा युवाहरु र अन्य नागरिक उत्तिकै संख्यामा नाम दर्ता गर्न आएको लुंगेलीले बताइन् । यो संख्या राष्ट्रिय परिचयपत्र तथा पञ्जिकरण विभागबाट आउने संख्या बाहेकको संख्या भएको उनले बताएकी छिन् । राष्ट्रिय परिचयपत्रको लागि वायोमेट्रिक गरेका तर निर्वाचन आयोगमा फोटो नखिचेकाहरुको तथ्यांक कति थपिन्छ भन्ने बारेमा आफुहरुलाई जानकारी नभएको उनले बताईन् ।
जिल्लामा कार्तिक १६ गतेसम्म १८ वर्ष पुरा गर्ने मतदाताको पुरानो तथ्यांक २ लाख ८ हजार ४१५ रहेको छ । पुरानो र मंसिर १ गतेसम्म थपिएका मतदाताको जम्मा संख्या दुई लाख दश हजार ३ सय २० जना पुगेको लुंगेलीले बताईन् । कार्तिक ३० गतेसम्म मतदाता नामावली दर्ता गर्नेको भिड भए पनि अहिले कम हुँदै गएको उनले बताईन् ।
