सिन्धुली । बागमति प्रदेश सभा सदस्य सुष्पा भुजेलले महिलाले आत्मशक्ति, आत्मसम्मान र आध्यात्मिक उर्जा पाएमा राष्ट्र प्रगतिमा अगाडि बढ्ने बताएकी छिन । ब्रह्मकुमारी राजयोग उपसेवा केन्द्र सिन्धुलीले आयोजना गरेको तीजको शुभकामना आदानप्रदान कार्यक्रमलाई सम्बोधन गर्दै उनले भनिन, ‘महिलाले आत्मशक्ति, आत्मसम्मान र आध्यात्मिक उर्जा पाएमा घर शान्त हुन्छ, परिवार नैतिकवान हुन्छ र राष्ट्र प्रगतिमा अगाडि बढ्छ ।’
उनले सत्यकर्म गर्ने, अपराध नगर्ने र सत्य बोल्न नछाड्ने गरि महिलाहरु अगाडि बढ्न आवश्यक रहेको बताईन । उनले महिलाहरुको नेतृत्वमा चलेको ब्रह्मकुमारी राजयोग अन्य संस्थाभन्दा अनुशासित, व्यवस्थित भएको बताउँदै महिलाहरुले नेतृत्व गरेमा सबै क्षेत्र व्यवस्थित हुनेमा जोड दिईन । त्यस्तै उनले ब्रह्मकुमारी राजयोग उपसेवा केन्द्रले सिन्धुलीको चपौलीमा निर्माण गर्न खोजेको मेरिटेशन हलका लागि आवश्यक सहयोग गर्ने प्रतिवद्धता समेत व्यक्त गरेकी छिन ।
कार्यक्रममा बोल्दै जिल्ला समन्वय समिति सिन्धुलीका उपप्रमुख शान्ता कार्कीले तीजलाई आत्मशुद्धी, सामाजिक सद्भाव र महिला सशक्तिकरणको पर्वका रुपमा मनाउनुपर्नेमा जोड दिईन ।
यस्तै कार्यक्रममा नेपाल पत्रकार महासंघ बागमती प्रदेशका उपाध्यक्ष बिमला पाण्डेले तीजलाई सामाजिक, पारिवारिक सद्भाव, माया प्रेम र समर्पणको पर्वका रुपमा मनाउन सबैलाई आग्रह गरेकी छिन । उनले सामाजिक सद्भाव र एकताको सन्देश बोकेको तीजलाई मौलिक रुपमै मनाउनुपर्ने र महिला सशक्तिकरणका रुपमा मनाउनुपर्ने बताईन ।
यस्तै नेपाल महिला संघ सिन्धुलीका अध्यक्ष गंगा दाहालले महिलाले घरदेखि समाजसम्मको नेतृत्व गर्नुपर्नेमा जोड दिईन । कार्यक्रममा समाजसेवी मञ्जु बर्माले तीजले भेटघाटको अवसर जुटाएको बताईन ।
ब्रह्मकुमारी संगिता गुप्ताको अध्यक्षता तथा बागमती प्रदेशसभा सदस्य सुष्पा भुजेलको प्रमुख आतिथ्यतामा भएको कार्यक्रममा अतिथि तथा सहभागि महिलाहरुलाई रुद्राक्षको मालाले सम्मान समेत गरिएको छ ।
