सिन्धुली । सिन्धुली अस्पतालमा अग्नि सुरक्षा नमुना अभ्यास गरिएको छ । सोमबार आकस्मिक आगलागी जस्ता विपद्का घटनामा कसरी सुरक्षित रहन सकिन्छ भन्ने अभ्यास गरिएको हो । नेपाली सेना, नेपाल प्रहरी, सशस्त्र प्रहरी र अस्पतालका स्वास्थ्यकर्मीहरुद्वारा अग्नि सुरक्षा अभ्यास गरिएको हो ।
सिन्धुली अस्पताल सिन्धुलीको आयोजना तथा जिल्ला प्रशासन कार्यालय सिन्धुली, जिल्ला प्रहरी कार्यालय सिन्धुली, नेपाली सेना श्री भवानी बकस गण सिन्धुली, सशस्त्र प्रहरी बल नेपाल गुल्म सिन्धुली र नेपाल रेडक्रस सोसाइटी सिन्धुलीको सहयोग तथा समन्वयमा अग्नि सुरक्षा नमुना अभ्यास कार्यक्रम गरिएको हो ।
“सुरक्षित अस्पताल, सुरक्षित समुदाय” भन्ने नारा सहित आयोजित कार्यक्रममा अस्पताल परिसरभित्र सम्भावित आगलागीको काल्पनिक अवस्था सिर्जना गरी उद्धार, नियन्त्रण तथा व्यवस्थापनका विभिन्न अभ्यासहरू प्रदर्शन गरिएको थियो । कार्यक्रममा आगलागी भएको अवस्थामा बिरामीलाई सुरक्षित स्थानमा सार्ने, आगो नियन्त्रणका प्रारम्भिक उपाय अपनाउने, दमकल तथा सुरक्षा निकायसँग समन्वय गर्ने लगायतका विषयमा प्रयोगात्मक अभ्यास गरिएको थियो ।
कार्यक्रममा आगो नियन्त्रण गर्ने उपकरणको प्रयोग, आपतकालीन उद्धार तथा प्राथमिक उपचार सम्बन्धी अभ्यास समेत गरेका थिए । आकस्मिक आगलागी जस्ता विपद्का घटनामा कसरी सुरक्षित रहने तथा बिरामी, स्वास्थ्यकर्मी र सेवाग्राहीको जीवन रक्षा गर्ने भन्ने उद्देश्यले अग्नि सुरक्षा अभ्यास कार्यक्रम गरिएको आयोजकले जनाएको छ ।
सिन्धुली अस्पताल विकास समितिका अध्यक्ष सतिशचन्द्र ढकाल तथा कमलामाई नगरपालिका सिन्धुलीका प्रमुख उपेन्द्र पोख्रेलको प्रमुख आतिथ्यतामा भएको कार्यक्रममा बोल्दै नगर प्रमुख पोख्रेलले अस्पतालमा हुने विपद्का घटनाले ठूलो जनधनको क्षति हुन सक्ने भएकाले पूर्व तयारी र सचेतना आवश्यक रहेको बताए ।
त्यस्तै सिन्धुली अस्पतालका व्यवस्थापन समितिका अध्यक्ष सतिशचन्द्र ढकालले सिन्धुली जिल्ला पनि विपद न्यूनीकरण गर्न सक्षम भएको बताए ।
